مصری تاریخ کے حوالے سے دلچسپ انکشافات

ماہرین آثار قدیمہ نے انسانی تاریخ کی پہلی جداگانہ ریاست کے قیام کے حوالے سے ریکارڈ مرتب کرنے میں اہم کامیابی حاصل کی ہے-

بی بی سی کی رپورٹ کے مطابق برطانیہ کے سائنس دانوں کی ایک ٹیم نے معلوم کیا ہے کہ مصر میں الگ تھلگ کسانوں کے مجموعے سے بادشاہت تک کا سفر پہلے سے لگائے گئے اندازوں سے کہیں زیادہ تیزی سے طے ہوا تھا۔

سائنس دانوں نے ریڈیو کاربن ڈیٹنگ اور کمپیوٹر ماڈلز کی مدد سے معلوم کیا کہ مصر کا سب سے پہلا فرعون حور عحا 3100 قبل مسیح میں اقتدار میں آیا تھا۔
 

یہ تحقیق پروسیڈنگز آف دا رائل سوسائٹی نامی جریدے میں شائع ہوئی ہے۔

تحقیق کے سربراہ یونیورسٹی آف آکسفرڈ کے شعبۂ آثارِ قدیمہ سے تعلق رکھنے والے ڈاکٹر مائیکل ڈی ہیں۔ وہ کہتے ہیں ’قدیم دنیا میں مصری تہذیب کا قیام بہت منفرد واقعہ تھا۔ یہ ایک علاقائی ریاست تھی، جو اسی طرح سے قائم ہوئی جس طرح آج کی قومیں وجود میں آتی ہیں۔‘

انھوں نے کہا ’ہم سجھتے ہیں کہ اس ملک کے قیام کے عوامل کی تاریخ کے بارے میں خلا موجود تھا جسے پر کرنے کی ضرورت تھی۔‘

اب تک مصر کی تاریخ کے قدیم ترین دور کی ٹائم لائن محض اندازوں پر مبنی تھی۔

اس قدیم دور کے کوئی تحریری شواہد موجود نہیں تھے اس لیے اس عہد کی توقیت کے لیے قبرستانوں سے ملنے والے برتنوں کی ساخت سے رجوع کیا جاتا تھا۔

تاہم اب سائنس دانوں نے بالوں، ہڈیوں اور پودوں پر ریڈیو کاربن ڈیٹنگ کا طریقہ آزمایا، جس کے ساتھ ساتھ آثارِ قدیمہ سے ملنے والے شواہد اور کمپیوٹر ماڈل استعمال کر کے قدیم ریاست کے معرضِ وجود میں آنے کے دور کی نشان دہی کی۔