پاکستان کے مقبول ترین محل

پاکستان کی سرزمین قدرتی حسن سے مالا مال ہے- یہ متعدد خوبصورت قدرتی مقامات موجود ہیں جہاں کی سیر کی جاسکتی ہے- لیکن یہاں بہت سے ایسے خوبصورت اور تاریخی مقامات بھی موجود ہیں جو انسانوں کی جانب سے مختلف ادوار میں تعمیر کیے گئے- یہ مقامات اپنی خوبصورتی اور پرکشش تعمیرات کی وجہ سے دنیا بھر میں مقبول ہیں- ہم یہاں آپ کو پاکستان کے چند مشہور قلعوں یا محل کے بارے میں بتائیں گے-
 

Altit Fort
یہ محل وادی ہنزہ کے علاقے کریم آباد میں واقع ہے- التت فورٹ دراصل ہنزہ ریاست کے موروثی حکمرانوں کا گھر تھا- اس قلعے کی تاریخ تقریباً 900 سال پرانی ہے اسی وجہ سے اسے بلتستان کی قدیم ترین یادگار ہونے کا درجہ بھی حاصل ہے- یہ قلعہ تباہ حال ہوچکا تھا لیکن آغا خان ٹرسٹ نے ناروے اور جاپان کی مدد سے اسے دوبارہ بحال کیا- اور 2007 میں عام عوام کے لیے کھول دیا گیا-

Sadiq Garh Palace
صادق گڑھ محل پاکستان کے مقبول ترین مقامات میں سے ایک ہے اور یہ انتہائی خوبصورت اور چمک دمک کا حامل محل ہے- یہ محل پنجاب کے ضلع بہاولپور کے علاقے ڈیرہ نواب صاحب میں واقع ہے- یہ محل 1882 میں بہاولپور کے بادشاہ نواب صادق محمد خان چہارم نے تعمیر کروایا- اس وقت اس محل کی تعمیر پر 15 لاکھ روپے کی لاگت آئی اور مکمل ہونے میں 10 سال کا عرصہ لگا-اس محل میں ایک بہت بڑا سرسبز لان موجود ہے اور عمارت کے وسط میں ایک بہت خوبصورت گنبد بھی موجود ہے-

Rohtas Fort
روہتاس قلعہ پاکستان کی انتہائی متاثر کن یادگاروں میں سے ایک ہے- اس قلعے کی تعمیر بادشاہ شیر شاہ سوری نے 1540 سے 1547 عیسوی کے درمیان کروائی- یہ دریائے جہلم کے نزدیک قصبہ دینا میں واقع ہے- اس قلعے کی تعمیر کا مقصد مقامی قبائلیوں کی طرف سے ہونے والی مزاحمت کو کچلنا تھا- اس قلعے کے بارہ دروازے تھے اور یہاں 30 ہزار افراد کی فوج ہوا کرتی تھی- اس قلعے کے زیادہ تر حصے ashlar کے پتھر سے تعمیر کیے گئے- اس کی دیواریں بہت بڑی اور مضبوط ہیں-

Red Fort Muzaffarabad
لال قلعے کو مظفر آباد قلعے کے طور پر بھی جانا جاتا ہے- یہ قلعہ کشمیر کے ضلع مطفر آباد میں دریائے نیلم کے گرد واقع ہے- اس قلعے کی تعمیر ابتدائی طور پر چک حکمرانوں نے کروائی تاہم اس کو مکمل سلطان مظفر خان نے کروایا- یہ قلعہ کشمیر کے مغلیہ دور میں اپنی اہمیت کھو چکا تھا کیونکہ ان مغل حکمرانوں کی دلچسپی کابل٬ بخارا اور بدخشاں میں تھی- درانی حکمرانوں کے دور میں اس کی اہمیت دوبارہ اجاگر ہونا شروع ہوئی- دریائے نیلم کو تین اطراف سے گھیرے اس قلعے کا ڈیزائن اور ساخت انتہائی منفرد ہے-

Derawar Fort
دراوڑ قلعہ بہاولپور کے علاقے ڈیرہ نواب شاہ سے 48 کلومیٹر کے فاصلے پر واقع ہے- یہ قلعہ پاکستان کے کے بڑے رقبے پر پھیلے قلعوں میں سے ایک ہے اور اب تک بہترین حالت میں موجود ہے- اس قلعے میں 40 گڑھ موجود ہیں اور اسے چولستان میں میلوں دور سے بھی دیکھا جاسکتا ہے- اس کی دیواریں 30 میٹر اونچی ہیں- اس قلعے کی تعمیر ہندو راجپوت رائے جاجا بھٹی نے کروائی- یہ قلعہ اس وقت تک شاہی خاندان کی رہائش گاہ رہا جب تک کہ 1733 میں بہاولپور کے نوابوں نے اس پر قبضہ نہ کرلیا- اس قلعے میں نوابوں اور ان کے خاندانوں کی قبریں بھی موجود ہیں-

Faiz Mahal
فیض محل پاکستان کے شاندار فن تعمیر کے نمونوں میں سے ایک ہے اور یہ صوبہ سندھ کے ضلع خیرپور میں واقع ہے- اس خوبصورت محل کی تاریخ 200 سال پرانی ہے- اس محل کی تعمیر خیرپور کے شاہی خاندان تالپور میرس نے 1798 میں کروائی اور یہ خاندان خیرپور کے امیر افراد پر مشتمل تھا- اس محل کو آرام گڑھ کے طور پر بھی جانا جاتا ہے- یہ مغل طرز تعمیر اور آرٹ ورک کا ایک بہترین نمونہ سمجھا جاتا ہے-

Bala Hissar Castle
بالا حصار قلعہ پشاور کے سب سے زیادہ قدیم تاریخی مقامات میں سے ایک ہے- 19ویں صدی کے آغاز میں یہ قلعہ افغان بادشاہوں کی رہائش گاہ تھا- اس قلعے کا نام پشتون بادشاہ تیمور شاہ درانی نے رکھا- اسے افغان درانی سلطنت کے موسم سرما کے دارالحکوت کے طور پر استعمال کیا جاتا تھا- یہ قلعہ متعدد بار تعمیر اور تباہی کا شکار ہوچکا ہے جس کی وجہ یہاں ہونے والے جنگجوؤں کے حملے ہیں- آخری دفعہ یہ تباہی شکار افغان بادشاہ شیر شاہ سوری کی وجہ سے ہوا جبکہ اس کی تعمیر مغل بادشاہ ہمایوں نے کروائی-

Ranikot Fort
رانی قلعے کو دیوارِ سندھ کے طور پر بھی جانا جاتا ہے- یہ قلعہ جامشورو ضلع میں کیرتھر کے علاقے میں لکی پہاڑوں کے سلسلے میں واقع ہے- یہ دنیا کا سب سے بڑا قلعہ بھی ہے جو کہ 26 کلومیٹر تک پھیلا ہوا ہے- یقیناً یہ پاکستان کے عجائبات میں سے ایک ہے- ممکنہ طور پر یہ قلعہ فارسی معزز فرد عمران بن موسیٰ نے تعمیر کروایا جو کہ 836 میں سندھ کے گورنر تھے- 1812 میں میر کرم علی خان تالپور اور ان کے بھائی میر مراد علی نے اسے دوبارہ تعمیر کروایا تھا-

Noor Mahal
بہاولپور میں واقع نور محل کا تعلق برطانوی راج کے دوران بہاولپور کی شاہی ریاست کے نواب سے تھا-اس محل کی تعمیر 1872 میں نواب صبح صادق نے کروائی- یہ محل نواب نے اپنی بیوی کے لیے تعمیر کروایا تاہم انہوں نے یہاں صرف ایک رات بسر کی- جب نواب کی بیوی نے محل کے بالکونی سے محل سے ملحقہ قبرستان کو دیکھا تو اس نے یہاں دوسری رات بسر کرنے سے انکار کردیا- اب یہ محل پاکستان آرمی کی ملکیت ہے اور عوام کے لیے بھی کھلا ہے- اور اسے ریاست کے مہمان خانے کے طور پر استعمال کیا جاتا ہے-