|
کئی زمانے اِتنی تیزی سے گزر گئے ہیں کہ گویا ہمارے سَر
سے گزر گئے ہیں۔ کوئی کہاں تک اور کس رفتار سے بھاگے؟ وقت کی رفتار ایسی ہے
کہ دوڑنے والوں کا سانس آن کی آن میں پُھول جاتا ہے، ناک میں دم آ جاتا ہے۔
ایک زمانہ تھا کہ ہم شام کے حسین لمحات دوستوں یا اہل خانہ کے ساتھ گزارا
کرتے تھے۔ پھر یہ ہوا کہ اخباری ملازمت نے زندگی کے معاشرتی پہلو کو ذبح
کردیا۔ گویا اِس شعبے میں آنے سے پہلے ہم بھی نارمل انسان تھے۔ شام تک گھر
پہنچ جاتے تھے اور اہلِ خانہ کو صرف درشن ہی نہیں دیتے تھے بلکہ اُن کے
ساتھ بیٹھ کر کھانا بھی کھا لیا کرتے تھے۔ عام آدمی کی ایسی ہی زندگی تھی۔
تب تک ڈش اینٹینا نہیں آیا تھا۔ اور موبائل فون بھی نہیں تھے۔ یعنی وقت
اچھا خاصا تھا اور اُسے باضابطہ یعنی منصوبہ بندی کے تحت خرچ کرنا پڑتا
تھا۔ پہلے تو وی سی آر کی ’’بدولت‘‘ بیشتر گھر سنیما گھر میں تبدیل ہوئے۔
پھر یہ ہوا کہ بیسیوں چینلز گھر بیٹھے دیکھنے کی سہولت میسر ہوگئی۔ لوگ ٹی
وی اسکرین کے غلام ہوکر رہ گئے۔ اِس منزل سے گزرے تو موبائل فون کا اونٹ
ہماری زندگی کے خیمے میں داخل ہوا۔ پھر یہ ہوا کہ ہم خود خیمے سے باہر
ہوگئے۔ موبائل فون کی مہربانیاں تو خیر اب تک جاری ہیں مگر اِسی دوران
انٹرنیٹ کی آمد نے رہی سہی کسر پوری کردی۔ دوسری بہت سی ایجادات و اختراعات
کی طرح انٹرنیٹ بھی ناگزیر تھا مگر ہم نے اِسے آسانیاں پیدا کرنے والے
ذریعے کے بجائے مقصدِ حیات میں تبدیل کر ڈالا۔ منزل تک پہنچنے کے لیے راستہ
لازم ہوا کرتا ہے۔ ہم نے ہر راستے کو منزل کا درجہ دے دیا ہے، اور وہ بھی
از خود نوٹس کے تحت!
اب انٹرنیٹ ہے اور ہم ہیں۔ زندگی کا کون سا پہلو ہے جو انٹرنیٹ کی دست بُرد
سے بچا ہے۔ اور کیا ہے جو انٹرنیٹ پر میسر نہیں۔ مگر ہم نے اِس سپر مارکیٹ
سے صرف وہی چیزیں خریدی ہیں جو ہماری تن آسانی کو چھیڑنے سے باز رہیں۔
انٹرنیٹ کا استعمال بھی سوشل میڈیا کی اسیری اختیار کرنے، تفریحِ طبع کے ہر
آئٹم میں دلچسپی لینے یا پھر چند مُخربِ اخلاق ویب سائٹس کے دیکھنے تک رہ
گیا ہے۔ کچھ لوگ ڈراموں سے دل بہلاتے ہیں۔ کسی کو فلمیں دیکھنی ہوتی ہیں۔
بس، ہمارے لیے تو یہی انٹرنیٹ کی کُل کائنات ہے۔
سوشل میڈیا کی اصلاح بھی خوب ہے۔ جس چیز نے ہمیں نان سوشل، بلکہ بہت حد تک
اَن سوشل کر ڈالا ہے اُسے سوشل میڈیا قرار دیا جارہا ہے! نئی نسل کو فیس
بُک اور ٹوئٹر سے فُرصت نہیں اور اِس سے آگے کچھ بھی دکھائی نہیں دیتا۔ سچ
تو یہ ہے کہ پیچھے بھی کچھ دکھائی نہیں دیتا۔ یعنی مُڑ کر دیکھیے تو اندازہ
ہوتا ہے کہ اچھا خاصا وقت ضائع کردیا ہے۔
نئی نسل کو ایک واضح لائن مل گئی ہے اور وہ ہے آن لائن۔ نوجوان فیس بُک کے
پیج پر رہتے ہیں یا پھر ٹوئٹر پر براجمان دکھائی دیتے ہیں۔ فیس بُک کے پیج
پر پائی جانے والی ’’وال‘‘ کو نئی نسل دیوارِ گریہ کے طور پر استعمال کرتی
ہے یعنی اپنا اور دوسروں کا ماتم کرتی رہتی ہے۔ کسی کے پاس کچھ ہو تو اُس
میں دوسروں کو شریک کرنے کا سوچنا معقول معلوم ہوتا ہے۔ ہماری نئی نسل کا
کمال یہ ہے کہ کچھ نہ ہونے پر بھی بہت کچھ ’’شیئر‘‘ کرنا چاہتی ہے! طریقِ
واردات وہی ہے یعنی شیئرنگ بھی ہوتی ہے تو فیس بُک کے پیج پر! ہم نے تو
ایسے نوجوان بھی دیکھتے ہیں جو فیس بُک پیج کو کچن اور ڈائننگ ٹیبل کے طور
پر بھی استعمال کرتے ہیں یعنی وہ اپنے پیج پر آن لائن رہنے ہی کو پیٹ بھرنے
کا ذریعہ سمجھ بیٹھے ہیں۔ اُنہوں نے اپنی زندگی سے باقی سب کچھ نکال کر ایک
طرف رکھ دیا ہے۔ پھینکا اِس لیے نہیں کہ مبادا ضرورت پڑ جائے! فیس بک اور
دیگر سوشل میڈیا کے رسیا نوجوانوں کا تو بس نہیں چلتا کہ وہیں سے آکسیجن
بھی کشید کریں اور وہیں بستر ڈال کر سو بھی جائیں۔ اگر کسی دن فیس بُک یا
ٹوئٹر پر نہ جاسکیں تو زندگی میں کوئی بڑی کمی سی محسوس ہوتی ہے، جیسے بہت
کچھ کہیں راستے میں گر گیا ہو! کسی بھی وجہ سے سوشل میڈیا پر دو تین دن
غائب رہنے سے بعض نوجوانوں کو جتنا ملال ہوتا ہے اُتنا ملال تو بہت سوں کو
اب کسی عزیز کے مرنے پر بھی نہیں ہوتا! سوشل میڈیا پر پوسٹ کئے جانے والے
کمنٹس سے اندازہ ہوتا ہے کہ نئی نسل کو اندازہ ہی نہیں کہ جب سوشل میڈیا
نہیں تھا تب بھی بہت کچھ تھا جو سوشل تھا اور سب سے بڑھ کر یہ کہ زندگی
اچھی خاصی سوشل تھی! مگر اب نئی نسل کو کیا سمجھائیں کہ جب یہ سب کچھ نہیں
تھا تب زندگی کی کیا شکل تھی۔
لطفِ مے تُجھ سے کیا کہیں زاہد!
ہائے کم بخت، تو نے پی ہی نہیں
جو نوجوان سوشل میڈیا کو زیادہ وقت دیتے ہیں اُنہیں خاصا متحرک سمجھا جاتا
ہے۔ خوب! جو بظاہر کسی کام کا نہیں اور کچھ نہ کرے وہی متحرک اور کام کا
قرار پائے۔
ستم ظریفی یہ ہے کہ دنیا بھر میں کاروباری ادارے اب ملازمین بھرتی کرتے وقت
یہ بھی دیکھتے ہیں کہ سوشل میڈیا پر اُن کا اسٹیٹس کیا ہے۔ یعنی جس کے دوست
اور فالوئرز زیادہ ہوں وہ زیادہ موزوں قرار پائے گا۔ امریکی ریاست ورجینیا
کی اولڈ ڈومینین یونیورسٹی کے عمرانیات کے ماہرین نے ایک اسٹڈی میں بتایا
ہے کہ آجروں کو بہترین افرادی قوت کے انتخاب میں فیس بُک غیر معمولی مدد
فراہم کرتی ہے۔ فیس بُک پروفائل سے امیدوار کی شخصیت کا بہت حد تک درست
اندازہ لگایا جاسکتا ہے۔ فیس بُک پروفائل سے حاصل کردہ معلومات اور سیلف
رپورٹیڈ پرسنلٹی ٹیسٹ میں غیر معمولی مطابقت پائی گئی۔ معاشرتی اُمور کی
محقق کیٹلین کاوانو کا کہنا ہے کہ سوشل میڈیا اور خاص طور پر فیس بُک سے
ملازمت کے کسی بھی امیدوار کے بارے میں تازہ ترین اپ ڈیٹس ہی معلوم نہیں ہو
پاتیں بلکہ پورا ٹریک ریکارڈ سامنے آ جاتا ہے۔
ہم سمجھ نہیں پائے یہ کیسے ماہرین ہیں جو سوشل میڈیا کے سمندر میں غرق
ہوجانے والوں کو کام کے لیے موزوں قرار دے کر ہمارے خیالات پر مِٹّی ڈال
رہے ہیں! جس طرح دِل آ جانے کے بعد انسان کسی کام کا نہیں رہتا بالکل اُسی
طرح سوشل نیٹ ورکنگ کی ویب سائٹس کے مایا جال میں پھنس جان والے ہمیشہ جاں
بہ لب رہتے ہیں، کسی کام کے نہیں رہتے!
ہماری نئی نسل بہت زیادہ سوشل بننے کی کوشش میں خاصی unsocial اور
unethical ہوگئی ہے۔ جب راہ کو منزل سمجھ کر خوش ہو رہنے کی ذہنیت پنپ جائے
تو ایسا ہی ہوا کرتا ہے۔ ہمیں حیرت ہے کہ سوشل میڈیا پر متحرک رہنے والے
اچھے ملازم کیسے ثابت ہوسکتے ہیں کیونکہ جو اِس طلسمات میں گیا، پتھر کا
ہوگیا۔ کئی نوجوانوں کو ہم نے پتھر کا ہوتے دیکھا ہے۔ اور معاملہ نوجوانوں
تک کہاں محدود ہے، اچھی خاصی عمر والے بھی سوشل میڈیا کی زُلفِ ناز کے اسیر
ہیں۔ اور سچ تو یہ ہے کہ بہت سوں نے اِس زُلفِ ناز کو خوشی خوشی اپنے گلے
کا پھندا بنا ڈالا ہے۔ سوشل میڈیا کو جس نے گلے لگایا وہ پھر کسی اور کو
پورے مَن سے اپنا نہ سکا۔ گویا بہ قول جوشؔ ملیح آبادی
تیری ہی زُلفِ ناز کا اب تک اسیر ہوں
یعنی کسی کے دام میں آیا نہیں ہنوز
سوشل میڈیا رابطوں کا موثر ترین ذریعہ ہونے کے ساتھ ساتھ نمک کی کان بھی
ہے۔ ہم نے جس کسی کو اِس راہ پر چلتے دیکھا ہے وہ پھر کسی منزل کا شیدائی
دکھائی نہیں دیا۔ گویا
منزلیں ڈھونڈتی ہی رہ جائیں
راہ کی دِل کشی میں کھو جاؤں!
نمک کی اِس کان میں جو بھی گیا اُسے ہم نے نمک ہوتے دیکھا ہے۔ سوشل رہنے کا
ہم نے تو یہ گُر کھوج نکالا ہے کہ سوشل میڈیا پر کم کم جاتے ہیں اور درست
راہ پر گامزن رہنے کے لیے کم کم آن لائن ہوتے ہیں۔ |