دنیا و آخرت کی کامیابی کا ذریعہ…… نماز

(Rana Aijaz Hussain, )

حصول پاکستان کا مقصد ایک آزاد ، خودمختار ہی نہیں بلکہ اسلامی فلاحی ریاست کا قیام تھا۔ نہایت ہی خوشی کی بات ہے اﷲ تبارک تعالیٰ کی طرف سے رجب کے مہینہ میں نماز کا حکم جاری ہوا،اور رجب ہی کے مہینے میں قیام پاکستان کے 58 برس بعد باضابطہ طور پر یہاں نظام الصلوٰۃ نافذ العمل کیا گیا ہے۔ پہلے مرحلے میں دارالحکومت اسلام آباد میں تمام علمائے دین کی مشاورت کے بعدیکساں میقات الصلوٰۃ نافذ کردیا گیا ہے۔ اس کے بعد پورے ملک میں اس نظام کو نافذ کردیا جائے گا۔ اس نظام کے نفاذ کے بعد اگلے مرحلے میں پورے ملک میں سعودی طرز پر نماز کی پابندی کا قانون ہونا چاہیے۔ کیونکہ نماز، ایمان کے بعد اسلام کا اہم ترین رُکن ہے۔ قرآن کریم اور احادیث مبارکہ میں نماز کی اہمیت وفضیلت کو کثرت سے ذکر کیا گیا ہے جن میں نماز کو قائم کرنے پر بڑے بڑے وعدے اور نماز کو ضائع کرنے پر سخت وعیدیں وارد ہوئی ہیں۔ قرآن وحدیث میں اس اہم اور بنیادی فریضہ کو کثرت سے بیان کیا گیا ہے۔ صرف قرآنِ پاک میں تقریباً سات سو مرتبہ، کہیں اشارۃ ً اور کہیں صراحۃً مختلف عنوانات سے نماز کا ذکر ملتا ہے۔ صرف نماز ہی دین اسلام کا ایک ایسا عظیم رُکن ہے جسکی فرضیت کا اعلان زمین پر نہیں بلکہ ساتوں آسمانوں کے اوپر بلند واعلیٰ مقام پر معراج کی رات ہوا۔ نیز اس کا حکم حضرت جبرائیل علیہ السلام کے ذریعہ نبی اکرم ﷺ تک نہیں پہنچا، بلکہ اﷲ تعالیٰ نے فرضیت ِ نماز کا تحفہ بذاتِ خود اپنے حبیب ﷺکو عطاء فرمایا۔ معراج کے واقعہ کی تاریخ اور سال کے متعلق ‘ مؤرخین اور مفسرین کی رائے مختلف ہیں۔ لیکن نماز کی فرضیت کا حکم رجب کے مہینہ میں ہوا۔

پابندی نماز کی تاکید کے حوالے سے قرآنی احکا مات دیکھئے۔ قرآن کریم کر سورۂ العنکبوت کی آیت نمبر ۴۵ میں اﷲ رب العزت فرماتے ہیں ’’ جو کتاب آپ پر وحی کی گئی ہے اسے پڑھئے اور نماز قائم کیجئے، یقینا نماز بے حیائی اور برائی سے روکتی ہے۔‘‘ نماز میں اﷲ تعالیٰ نے یہ خاصیت وتاثیر رکھی ہے کہ وہ نمازی کو گناہوں اور برائیوں سے روک دیتی ہے مگر ضروری ہے کہ اس پرپابندی سے عمل کیا جائے اور نماز کو اُن شرائط وآداب کے ساتھ پڑھا جائے جو نماز کی قبولیت کے لئے ضروری ہیں،جیسا کہ حدیث میں ہے کہ ایک شخص نبی اکرم ﷺکی خدمت میں آیا اور کہا کہ فلاں شخص راتوں کو نماز پڑھتا ہے مگر دن میں چوری کرتا ہے تو نبی اکرم ﷺ نے فرمایا کہ ُاس کی نماز عنقریب اُس کو اِس برے کام سے روک دے گی۔ (مسند احمد) ‘‘ سورۂ البقرۃ کی آیت نمبر ۱۵۳ میں ارشاد باری تعالیٰ ہے ’’اے ایمان والو! صبر اور نماز کے ذریعہ مدد چاہو، بیشک اﷲ تعالیٰ صبر کرنے والوں کے ساتھ ہے۔‘‘ جب بھی کوئی پریشانی یا مصیبت سامنے آئے تو مسلمان کو چاہئے کہ وہ اُس پر صبر کرے اور نماز کا خاص اہتمام کرکے اﷲ تعالیٰ سے تعلق قائم کرے۔حضور اکرم ﷺبھی ہر پریشانی کے وقت نماز کی طرف متوجہ ہوتے تھے جیسا کہ حدیث میں ہے حضرت حذیفہ رضی اﷲ تعالیٰ عنہ فرماتے ہیں کہ نبی اکرم ﷺکو جب بھی کوئی اہم معاملہ پیش آتا، آپ فوراً نماز کا اہتمام فرماتے۔ (ابو داود ومسند احمد) نبی اکرم ﷺپانچ فرض نماز وں کے علاوہ نماز تہجد، نماز اشراق، نماز چاشت، تحیۃ الوضوء اور تحیۃ المسجد کا بھی اہتمام فرماتے، اور پھر خاص خاص مواقع پر اپنے رب کے حضور توبہ واستغفار کے لئے نماز ہی کو ذریعہ بناتے، سورج گرہن یا چاند گرہن ہوتا تو مسجد تشریف لے جاتے۔ زلزلہ، آندھی یا طوفان حتی کہ تیز ہوا بھی چلتی تو مسجد تشریف لے جاکر نماز میں مشغول ہوجاتے۔ فاقہ کی نوبت آتی یا کوئی دوسری پریشانی یا تکلیف پہنچتی تو مسجد تشریف لے جاتے۔ سفر سے واپسی ہوتی تو پہلے مسجد تشریف لے جاکر نماز ادا کرتے۔ اس لئے ہمیں بھی چاہئے کہ نماز کا خاص اہتمام کریں۔ اور اگر کوئی پریشانی یا مصیبت آئے تو نماز کی ادائیگی اور صبر کے ذریعہ اﷲ تعالیٰ سے مدد مانگیں۔

سورۂ المائدہ کی آیت ۱۲میں اﷲ تعالیٰ فرماتے ہیں کہ میں تمہارے ساتھ ہوں اگر تم نماز قائم رکھوگے اور زکواۃ دیتے رہوگے۔ ‘‘ یعنی نماز کی پابندی کرنے سے بندہ اﷲ تعالیٰ کے بہت زیادہ قریب ہوجاتاہے جیسا کہ نبی اکرم ﷺ نے فرمایا بندے کو اﷲ تعالیٰ کا سب سے زیادہ قرب سجدے کی حالت میں حاصل ہوتا ہے۔ ‘‘ قرآن کریم میں ہی ارشاد ربانی ہے’’ یقینا ان ایمان والوں نے فلاح (کامیابی) پائی جو اپنی نماز میں خشوع کرتے ہیں۔اور جو اپنی نماز کی خبر رکھتے ہیں، یہی وہ وارث ہیں جو (جنت) الفردوس کے وارث ہوں گے جہاں وہ ہمیشہ رہیں گے۔ (سورۂ المؤمنون) ‘‘ مومنین کی صفت‘ خشوع وخضوع کے ساتھ نماز ادا کرنا،اور نماز کی پوری طرح حفاظت کر نے والے بتلایا گیا ہے۔ اس سے ظاہر ہوتا ہے کہ نماز کا اﷲ تعالیٰ کے پاس کیا درجہ ہے اور کس قدر مہتم بالشان چیزہے کہ مومنین کی صفات کو نماز سے شروع کیا گیا ہے۔ اس کے بعد اﷲ تعالیٰ نے ارشاد فرمایا کہ یہی وہ لوگ ہیں جو جنت کے وارث یعنی حق دار ہوں گے، جنت بھی جنت الفردوس‘ جو جنت کا اعلیٰ حصہ ہے جـہاں سے جنت کی نہریں جاری ہوئی ہیں۔ غرض جنت الفردوس کو حاصل کرنے کے لئے نماز کا اہتمام بے حد ضروری ہے۔ ایک دوسری جگہ ارشاد ہے کہ ’’بیشک انسان بڑے کچّے دل والا بنایا گیا ہے جب اسے مصیبت پہنچتی ہے تو ہڑبڑا اٹھتا ہے اور جب راحت ملتی ہے تو بخل کرنے لگتا ہے، مگر وہ نمازی جو اپنی نماز کی پابندی کرتے ہیں۔ اور جو اپنی نماز کی حفاظت کرتے ہیں۔ یہی لوگ جنتوں میں عزت والے ہوں گے۔ (سورۂ المعارج ۱۹۔۳۵) ‘‘ ان آیات میں جنتیوں کی آٹھ صفات بیان کی گئی ہیں جن کو نماز سے شروع اور نماز ہی پرختم کیا گیاہے۔ معلوم ہوا کہ نماز اﷲ کی نظر میں کس قدر مہتم بالشان عبادت ہے۔

رسول اﷲ ﷺنے ارشاد فرمایا ’’قیامت کے دن آدمی کے اعمال میں سب سے پہلے فرض نماز کا حساب لیا جائیگا۔ اگر نماز درست ہوئی تو وہ کامیاب وکامران ہوگا، اور اگر نماز درست نہ ہوئی تو وہ ناکام اور خسارہ میں ہوگا۔ اس حدیث مبارکہ کو جامع ترمذی، ابن ماجہ، نسائی، ابوداود، مسند احمدنے نقل کیا ہے۔‘‘ ایک دوسری جگہ رسول اﷲ ﷺ نے ارشاد فرمایا ’’قیامت کے دن سب سے پہلے نماز کا حساب لیا جائے گا۔ اگر نماز اچھی ہوئی تو باقی اعمال بھی اچھے ہوں گے اور اگر نماز خراب ہوئی تو باقی اعمال بھی خراب ہوں گے۔ (طبرانی)‘‘ حضرت عبد اﷲ بن مسعود رضی اﷲ عنہ فرماتے ہیں کہ میں نے رسول اﷲ ﷺ سے دریافت کیا کہ اﷲ کو کونسا عمل زیادہ محبوب ہے؟ آپ ﷺ نے ارشاد فرمایا ’’نماز کو اس کے وقت پر ادا کرنا۔ حضرت عبد اﷲ بن مسعود رضی اﷲ عنہ فرماتے ہیں میں نے کہا کہ اس کے بعد کونسا عمل اﷲ کو زیادہ پسند ہے؟ تو آپ ﷺ نے فرمایا والدین کی فرمانبرداری۔ حضرت عبداﷲ بن مسعود رضی اﷲ عنہ فرماتے ہیں میں نے کہا کہ اس کے بعد کونسا عمل اﷲ کو زیادہ محبوب ہے؟ تو آپ ﷺ نے فرمایا اﷲ کے راستہ میں جہاد کرنا۔ ‘‘ (بخاری ، مسلم) حضرت عوف بن مالک اشجعی رضی اﷲ عنہ فرماتے ہیں کہ ہم رسول اﷲ ﷺکے پاس بیٹھے ہوئے تھے آپ ﷺ نے ارشاد فرمایا ’’اﷲ کے رسول سے بیعت نہیں کرتے؟ آپ ﷺ نے تین مرتبہ اسکو کہا، تو ہم نے اپنے ہاتھ بیعت کے لئے بڑھادئے اوربیعت کی۔ ہم نے کہا اے اﷲ کے رسول! ہم نے کس چیز پر بیعت کی؟ تو آپ ﷺ نے فرمایا صرف اﷲ کی عبادت کرو،اس کے ساتھ کسی کو شریک نہ کرو ،اورنماز کی پابندی کرو۔اس کے بعد آہستہ آواز میں کہا لوگوں سے کسی چیز کا سوال نہ کرو۔ (نسائی، ابن ماجہ، ابوداود، مسند احمد) ‘‘حضرت عبد اﷲ بن عمرو رضی اﷲ عنہ سے روایت ہے کہ ایک دن نبی اکرم ﷺ نے نماز کا ذکر فرماتے ہوئے ارشاد فرمایا جو شخص نماز کا اہتمام کرتا ہے تو نماز اس کے لئے قیامت کے دن نور ہوگی، اس (کے پورے ایماندار ہونے) کی دلیل ہوگی ، اور قیامت کے دن عذاب سے بچنے کا ذریعہ ہوگی۔ اور جو شخص نماز کا اہتمام نہیں کرتا اس کے لئے قیامت کے دن نہ نور ہوگا، نہ اس (کے پورے ایماندار ہونے) کی کوئی دلیل ہوگی، نہ عذاب سے بچنے کا کوئی ذریعہ ہوگا۔ اور وہ قیامت کے دن فرعون، قارون، ہامان اور ابی بن خلف کے ساتھ ہوگا۔ (صحیح ابن حبان ، طبرانی، بیہقی، مسند احمد)‘‘ علامہ ابن قیم ؒنے (کتاب الصلوٰۃ) میں ذکر کیا ہے کہ ان کے ساتھ حشر ہونے کی وجـہ یہ ہے کہ اکثر ان ہی باتوں کی وجـہ سے نماز میں سستی ہوتی ہے جو ان لوگوں میں پائی جاتی تھیں۔ پس اگر اسکی وجہ مال و دولت کی کثرت ہے تو قارون کے ساتھ حشر ہوگا، اور اگر حکومت و سلطنت ہے تو فرعون کے ساتھ، اور وزارت (یا ملازمت) ہے تو ہامان کے ساتھ، اور تجارت ہے تو ابی بن خلف کے ساتھ حشر ہوگا۔ جو لوگ اپنے آپ کو مسلمان کہنے کے باوجود بالکل نماز ہی نہیں پڑھتے یا کبھی کبھی پڑھ لیتے ہیں، وہ غور کریں کہ ان کا انجام کیا ہوگا۔ یا اﷲ! اس انجامِ بد سے ہماری حفاظت فرما۔ آمین

رسول اﷲ ﷺ نے ارشاد فرمایا ’’ نماز نور ہے، صدقہ دلیل ہے، صبر کرنا روشنی ہے اور قرآن تمہارے حق میں دلیل ہے یا تمہارے خلاف دلیل ہے (یعنی اگر اسکی تلاوت کی اور اس پر عمل کیا تو یہ تمہاری نجات کا ذریعہ ہوگا ،ورنہ تمہاری پکڑ کا ذریعہ ہوگا)۔ (مسلم)‘‘ حضرت معاذ بن جبل رضی اﷲ عنہ فرماتے ہیں کہ میں ایک سفر میں نبی اکرم ﷺ کے ساتھ تھا۔ ایک دن میں آپ ﷺ کے قریب تھا، ہم سب چل رہے تھے۔ میں نے کہا اے اﷲ کے پیغمبر! آپ مجھے ایسا عمل بتادیجئے جسکی بدولت میں جنت میں داخل ہوجاؤں اور جہنم سے دور ہوجاؤں۔ آپ ﷺ نے فرمایا تم نے بڑی بات پوچھی ہے۔ لیکن اﷲ جس کے لئے آسان کردے اس کے لئے آسان ہے۔ اﷲ کی عبادت کرو اس کے ساتھ کسی کو شریک نہ کرو، نماز قائم کرو، زکواۃ دو، رمضان کے روزے رکھو اوراﷲ کے گھر کا حج کرو۔ پھر آپ ﷺ نے فرمایا کہ میں تمہیں اس معاملہ کی اصل، اس کا ستون اور اسکی عظمت نہ بتادوں؟ میں نے کہا ضرور۔ آپ ﷺ نے فرمایا معاملہ کی اصل اسلام ہے، اس کا ستون نماز ہے ، اور اسکی عظمت اﷲ کی راہ میں جہاد ہے۔ (ابن ماجہ، ترمذی، مسند احمد)‘‘ رسول اﷲ ﷺ نے ارشاد فرمایا ’’اﷲ تعالیٰ نے بندوں پر پانچ نمازیں فرض فرمائی ہیں، جو اِن نماز وں کو اس طرح لے کر آئے کہ ان میں لاپرواہی سے کسی قسم کی کوتاہی نہ کرے تو حق تعالیٰ شانہ کا عہد ہے کہ اس کو جنت میں ضرور داخل فرمائیں گے۔ اور جو شخص ایسا نہ کرے تو اﷲ تعالیٰ کا کوئی عہد اس سے نہیں، چاہے اسکو عذاب دیں چاہے جنت میں داخل کردیں ۔ ‘‘ ایک دوسری حدیث میں ہے کہ نبی اکرم ﷺ نے فرمایا اﷲ تعالیٰ نے اپنے بندوں پر پانچ نمازیں فرض فرمائی ہیں، جو نماز کو (قیامت کے دن) اس طرح لے کر آئے کہ ان میں لاپرواہی سے کسی قسم کی کوتاہی نہ کی ہو تو اﷲ تعالیٰ قیامت کے دن اس بندے سے عہد کرکے اس کو جنت میں داخل فرمائیں گے اور جو نماز کواس طرح لے کر آئے کہ ان میں لاپرواہیوں سے کوتاہیاں کی ہیں تو اﷲ کا اس سے کوئی عہد نہیں چاہے اسکو عذاب دیں ، چاہے معاف فرمادیں۔ (موطا مالک، ابن ماجہ، مسند احمد)‘‘ قارئین غور فرمائیے کہ نماز کی پابندی پر جس میں زیادہ مشقت بھی نہیں ہے، مالک الملک دو جہاں کا بادشاہ جنت میں داخل کرنے کا عہد کرتا ہے پھر بھی ہم اس اہم عبادت سے لاپرواہی کرتے ہیں۔

رسول اﷲ ﷺنے ارشاد فرمایا’’ جو شخص پانچوں نمازوں کی اس طرح پابندی کرے کہ وضو اور اوقات کا اہتمام کرے، رکوع اور سجدہ اچھی طرح کرے اور اس طرح نماز پڑھنے کو اﷲ تعالیٰ کی طرف سے اپنے ذمہ ضروری سمجھے تو اس آدمی کو جہنم کی آگ پر حرام کردیا گیا۔ (مسند احمد)‘‘ رسول اﷲ ﷺ نے ارشاد فرمایا ’’ جنت کی کنجی نمازہے، اور نماز کی کنجی پاکی (وضو) ہے۔ (ترمذی، مسند احمد)‘‘ حضرت ربیعہ بن کعب اسلمی رضی اﷲ عنہ فرماتے ہیں کہ میں حضور اکرم ﷺ کے پاس (آپکی خدمت کیلئے) رات گزارتا تھا، ایک رات میں نے آپ کے لئے وضو کا پانی اور ضرورت کی چیزیں پیش کیں۔ آپ ﷺنے فرمایا کچھ سوال کرنا چاہتے ہو تو کرو ۔ میں نے کہا میں چاہتا ہوں کہ جنت میں آپ کے ساتھ رہوں۔ آپ ﷺ نے فرمایا اس کے علاوہ کچھ اور۔ میں نے کہا، بس یہی۔ آپ ﷺ نے فرمایا کہ اپنی اس خواہش کی تکمیل کے لئے زیادہ سے زیادہ سجدے کرو ۔ (یعنی نماز کے اہتمام سے یہ خواہش پوری ہوگی)۔ خوش نصیب ہیں اﷲ کے وہ بندے جو اِس دنیاوی زندگی میں نماز کا اہتمام کرکے جنت الفردوس میں تمام نبیوں کے سردار حضرت محمد مصطفی ﷺکی مرافقت پائیں۔ (مسلم)‘‘ حضرت انس بن مالک رضی اﷲ عنہ سے روایت ہے کہ رسول اﷲ ﷺ نے ارشاد فرمایا میری آنکھوں کی ٹھنڈک نمازمیں رکھی گئی ہے۔ (نسائی، بیہقی، مسند احمد)‘‘ حضرت علی رضی اﷲ عنہ سے روایت ہے کہ نبی اکرم ﷺکی زبانِ مبارک سے نکلا آخری کلام (نماز، نماز اور غلاموں کے بارے میں اﷲ سے ڈرو ) تھا۔ (ابو داود، مسند احمد)‘‘ حضرت ام سلمہ رضی اﷲ عنہا فرماتی ہیں کہ رسول اﷲ ﷺنے آخــری وصیت یہ ارشاد فرمائی ، نماز، نماز ۔ اپنے غلاموں (اور ماتحت لوگوں) کے بارے میں اﷲ سے ڈرو، یعنی ان کے حقوق ادا کرو۔ جس وقت آپ ﷺنے یہ وصیت فرمائی آپ ﷺکی زبانِ مبارک سے پورے لفظ نہیں نکل رہے تھے۔ (مسند احمد)‘‘ حضرت عمرو اپنے والد اور وہ اپنے دادا (حضرت عبد اﷲ بن عمرو بن العاص رضی اﷲ عنہ) سے روایت کرتے ہیں کہ رسول اﷲ ﷺ نے ارشاد فرمایا’’اپنے بچوں کو سات سال کی عمر میں نماز کا حکم کرو۔ دس سال کی عمر میں نماز نہ پڑھنے پر انہیں مارو، اور اس عمر میں علیحدہ علیحدہ بستـروں پر سلاؤ ۔ (ابوداود)‘‘ اس حدیث مبارکہ میں والدین کو حکم دیا گیا کہ جب بچہ سات سال کا ہوجائے تو اسکی نماز کی نگرانی کریں، دس سال کی عمر میں نماز نہ پڑھنے پر پٹائی بھی کریں تاکہ بلوغت سے قبل نماز کا پابند ہوجائے، اور بالغ ہونے کے بعد اس کی ایک نماز بھی فوت نہ ہو کیونکہ ایک وقت کی نماز جان بوجھ کر چھوڑنے پر احادیث میں سخت وعیدیں وارد ہوئی ہیں۔

حضرت عمر بن خطاب رضی اﷲ عنہ نے اپنے گورنروں کو یہ حکم جاری فرمایا کہ میرے نزدیک تمہارے امور میں سب سے زیادہ اہمیت نماز کی ہے۔ جس نے نمازکی پابندی کرکے اسکی حفاظت کی، اس نے پورے دین کی حفاظت کی اور جس نے نماز کو ضائع کیا وہ نماز کے علاوہ دین کے دیگر ارکان کو زیادہ ضائع کرنے والا ہوگا۔ (موطا امام مالک)‘‘ حضرت عمر فاروق رضی اﷲ عنہ کے اس ارشاد سے واضح طور پر معلوم ہوا کہ جو شخص نماز میں کوتاہی کرتاہے، وہ یقینا دین کے دوسرے کاموں میں بھی سستی کرنے والا ہوگا۔ اور جس نے وقت پر خشوع وخضوع کے ساتھ نماز کا اہتمام کرلیا، وہ یقینا پورے دین کی حفاظت کرنے والا ہوگا۔ حضرت انس بن مالک رضی اﷲ عنہ فرماتے ہیں کہ شبِ معراج میں نبی اکرم ﷺ پر پچاس نمازیں فرض ہوئیں، پھر کم ہوتے ہوتے پانچ رہ گئیں۔ آخر میں (اﷲ تعالیٰ کی طرف سے) اعلان کیا گیا۔ اے محمد! میرے ہاں بات بدلی نہیں جاتی، لہذا پانچ نمازوں کے بدلے پچاس ہی کا ثواب ملے گا۔ (ترمذی)‘‘

حضرت معاذ بن جبل رضی اﷲ عنہ فرماتے ہیں کہ رسول اﷲ ﷺنے مجھے یمن بھیجا تو ارشاد فرمایا تم ایسے لوگوں کے پاس جارہے ہو جو اہل کتاب ہیں، لہذا سب سے پہلے ان کو اس بات کی دعوت دینا کہ اﷲ کے سواء کوئی معبود نہیں اور میں اﷲ کا رسول ہوں۔ جب اس بات کو مان لیں تو انہیں بتاؤ کہ اﷲ تعالیٰ نے روزانہ پانچ نمازیں ان پر (ہر مسلمان پر) فرض کی ہیں۔(بخاری ،مسلم)‘‘ رسول اﷲ ﷺنے ارشاد فرمایا ’’سات قسم کے آدمی ہیں جن کو اﷲ تعالیٰ اپنی (رحمت کے) سایہ میں ایسے دن جگہ عطا فرمائے گا جس دن اس کے سایہ کے سوا کوئی سایہ نہ ہوگا۔ اُن سات لوگوں میں سے ایک وہ شخص بھی ہے جس کا دل مسجد سے اٹکا ہوا ہو (یعنی وقت پر نماز ادا کرتا ہو) ۔ (بخاری ،مسلم)‘‘ رسول اﷲ ﷺ نے ارشاد فرمایا ’’ تم میں سے جب کوئی نماز کے لئے کھڑا ہوتا ہے تو وہ اﷲ سے مناجات (سرگوشی) کرتا ہے۔ (بخاری)‘‘

ہم تمام مسلمانوں کو اہم ترین عبادت نماز باجماعت کا خصوصی اہتمام کرنا چاہیے، بلاشبہ نماز دین کا اہم ستون ہے ، نماز مومن کی معراج ہے، اور مرنے کے بعد سب سے پہلے نماز کے بارے میں ہی سوال ہوگا۔ اس لیے ہم مسلمانوں کی ذمہ داری ہے کہ ہم پاکستان بھر میں نظام الصلوٰۃ کے مکمل نفاذ کو بھی یقینی بنائیں۔ دعا ہے کہ اﷲ تبارک وتعالیٰ ہم سب خشوع خضوع کے ساتھ نماز ادا کرنے والا بنائے۔ اور ہماری عبادات کو اپنی بارگاہ رحمت میں قبول فرمائے۔ آ مین

< PREVIOUS ‘‘تو مصطفوی ہے’’(2)NEXT > مسلمانوں کا عروج و زوال