سپریم کورٹ کا’’اسلامی فیصلہ‘‘؟

(Sadiq Raza Misbahi, India)

نربھیاکے مجرموں کی پھانسی کی سزاپرتصدیق کرکے عصمت دری کی اسلامی سزا کونادانستہ طورپرقبول کرنے والی سپریم کورٹ طلاق ثلاثہ اوریکساں سول کوڈپر ایک نہ ایک دن تھک ہار کر وہی کہے گی جواسلام کہتا آ ر ہا ہے

میڈیکل کی طالبہ نربھیاکی اجتماعی عصمت دری اوراس کی دردناک موت کے مجرمین کی پھانسی کی سزاپرجوں ہی سپریم کورٹ نے اپنی مہرثبت کی توپورے ملک سے واہ واہ کی صدائیں بلند ہونے لگیں اور اس فیصلے کوانصاف کے تقاضوں کے مطابق قراردیاجانے لگا۔میں سوچنے لگاکہ انسان فطرت سے چاہے کتنی بھی بغاوت کرلے مگراسے راحت فطرت کےدامن ہی ملتی ہے۔آج ملک میںہندتووادی اسلامی تعلیمات کے خلاف اپنی بھڑاس نکال رہے ہیں اوربی جے پی حکومت پورے ملک کوہندتوکے رنگ میں رنگنے کے ہزارجتن کررہی ہےمگراسے آناوہیں ہے جہاں فطرت اسے لے جاناچاہتی ہے۔ زانیوں کی سزاموت ہی ہونی چاہیے، یہی قانون فطرت ہے۔یہ بات دنیاکی عدالتوں کوآج سمجھ میں آئی ہے مگر اسلام ساڑھے چودہ سوبرسوں سے یہی سمجھاتاآرہاہےلیکن چھوٹی اورسطحی عقلوں نے ہمیشہ اسے اپنے ذہنی فریم ورک میں فٹ کرنے کی کوشش کی مگرناکام رہیں ۔سائنس کہتی ہےکہ دنیااب تک اپنی عقل کا صرف پانچ فیصدحصہ ہی استعمال کرسکی ہے ،ظاہرہے کہ پانچ فیصدعقل والاانسان اس حکم کو کیسے سمجھ سکتا ہے جس میںسوفیصدحکمت ودانش استعمال کی گئی ہو ۔ انسان بڑے گہرے مطالعے،مشاہدے اورتجربے سے جہاں پہنچتاہے اسلامی حکم ایک جست میں اسے وہاں پہنچادیتاہے ۔ قرآن کریم نے زانیوں کو ساڑھے چودہ سوسال قبل ہی مجمع عام کے سامنے سنگ سارکرنے اورکوڑے مارنے کاحکم دےدیاتھا ۔اس سیاق میں سپریم کورٹ کے اس فیصلے کودیکھیںتویہ پھانسی بھی تقریباً ویسی ہی ہے جواسلام صدیوں پہلے دے چکا ہے۔پھانسی کی سزا،اسلامی حکم سنگساری اورکوڑے لگانے کے برابرتونہیں البتہ اس سے کچھ ملتی جلتی ضرور ہے۔ دوررسالت میں بھی زانی اورزانیہ کومجمع عام کے سامنے سنگ سارکیاجاتاتھا تاکہ وہ دوسروں کے لیے درس عبرت بن جائے اورسپریم کورٹ کی پھانسی کی سزا بھی دوسروںکے لیے درس عبرت ہے ، یہ الگ بات ہے کہ حکومتیں کسی وجہ سے اس سزاکے عمل کومشتہرنہیں کرتیں تاہم پھانسی کی سزاکااعلان اور پھرپھانسی کاعمل ، یہ دونوںہی سزاکی سنگینی،ہیبت اورانتباہ کی طرف اشارہ کرتے ہیں اور یہی ہیبت اور انتباہ عصمت دری کے مجرمین کے لیے اسلام کا مقصودبھی ہے تاکہ وہ مستقبل میںایساکام کرنے کاتصوربھی نہ کرسکیں۔آگے بڑھنے سے قبل ایک نظراس کیس پربھی ڈال لیں۔

۱۶؍دسمبر۲۰۱۲کو رات کے قریب ساڑھے نوبجے جنوبی دہلی کے’ منیرکا‘علاقے میں ۲۳سالہ میڈیکل کی طالبہ نربھیااپنے دوست کے ساتھ پالم وہارمیں واقع اپنے گھرجانے کے لیے بس کا انتظار کر رہی تھی کہ وہاں ایک سفیدبس آکررکی ،اس میں سے ایک شخص اترااوران دونوں سے بس میں چڑھنے کوکہا،یہ دونوں بس کے لیے ہی کھڑے تھے ،سوچاہوگاکہ وہ اپنی منزل مقصودتک پہنچ جائیں گے مگر وہاں کچھ اور ہی ان کامنتظرتھا،بس میں ڈرائیورسمیت کل چھ افرادتھے ۔ انہوںنے نربھیاکے ساتھ درندگی کی انتہاکردی ،بس چلتی رہی اوریہ حیوان اس کی اجتماعی عصمت دری کرتے رہے، نربھیاچیختی رہی مگربے سود ، اسے اوراس کے دوست کووہ لوگ بری طرح مارپیٹ کرمہی پال پورفلائی اوورکے قریب پھینک کر چلے گئے اورانہیں ایک پی سی آروین نے زخمی حالت میں صفدرجنگ اسپتا ل پہنچایا۔ نربھیا اسپتال میں موت و زندگی سے لڑتی رہی ،پورے ملک میں ہنگامہ ہوتارہا۔معاملے کی سنگینی کودیکھتے ہوئے اس وقت کے وزیراعظم من موہن سنگھ اورکانگریس صدرسونیاگاندھی اسے لے کرسنگاپورکے اسپتال لے گئے جہاں ۲۹ دسمبر کواس نے دم توڑدیا۔حادثے کے مجرم ۲۹سالہ مکیش،۲۲سالہ پون،۲۳سالہ ونے شرما اور ۳۱سالہ اکشے کمارسنگھ کوگرفتارکیاگیا،ایک اور مجرم رام سنگھ نے تہاڑجیل میںہی خودکشی کرلی اور یوںوہ اپنے کیفر کردارتک پہنچا۔اس جرم میں ایک نابالغ لڑکابھی شامل تھا جوتین سال چائلڈہوم میں قید کیے جانے کے بعدرہاہوگیا۔معاملہ کورٹ پہنچاتوفاسٹ ٹریک عدالت نے مجرموں کے لیے پھانسی کی سزا تجویز کی ، اس سزا کودہلی ہائی کورٹ میں چیلنج کیاگیااوردہلی ہائی کورٹ نے بھی ۱۴مارچ ۲۰۱۴کوذیلی عدالت کے فیصلے کو برقرار رکھا ، مجرموں کے وکلانے سپریم کورٹ جانے کی ٹھانی کہ شایدکچھ نرمی مل جائے مگر سپریم کورٹ نے بھی ۵مئی کوپھانسی کی سزاپرمہرلگادی ۔ماہرین کہتے ہیں کہ مجرموںکوپھانسی کی سزاملنے میں ابھی وقت لگ سکتاہے ،اس کی ایک وجہ تویہ ہے کہ مجرموموںکے وکیل نے سپریم کورٹ ہی میں ریویو اور کیوریٹو پٹیشن دائرکرنے کوکہاہے ،اگرسپریم کورٹ نے انہیں راحت نہیں دی توپھروہ صدرجمہوریہ کے پاس رحم کی درخواست کرسکتے ہیں۔ ممکن ہے کہ صدرجمہوریہ ہنداس پھانسی کوسزاکومعطل کردیں مگریہ تویقین سے کہا جا سکتاہے کہ ظلم وبربریت کے ساتھ اجتماعی عصمت دری کرنے والے مجرمین کی سزاپھانسی کے سواکچھ اورنہیں ہو سکتی۔

ملک میں ہرسال ۳۰ہزارسے زائدعصمت دری کے واقعات ہوتے ہیں اوریہ وہ واقعات ہیں جن کی رپورٹ پولیس اسٹیشنوں میں درج ہوتی ہے ورنہ اس کافیصدتو کئی گنازیادہ ہے۔نیشنل کرائم ریسرچ کے سروے کے مطابق عصمت دری کے واقعات میں اضافہ ہی ہورہاہے ۔ملک میں ہرگھنٹے میں عصمت دری کاایک واقعہ رونماہوتاہے اورقبائلی یالورکلاس کی بچیاں زیادہ متاثر ہوتی ہیں ۔ ہندوستان میں عصمت دری چوتھابڑاکامن جرم ہے ۔آئین ہندکی دفعہ ۳۷۶عصمت دری سے متعلق ہے۔ ۱۹۸۳سے قبل اس دفعہ کے تحت عصمت دری کے مجرمین کوزیادہ سے زیادہ ایک مہینے کی سزا دی جاتی تھی اور جب اس طرح کے کیسو ں میں اضافہ ہواتوپھرترمیم کرکے سخت سزاتجویزکی گئی اوراسے سات سال کیا گیا اورخاص کیسو ںمیں دس سال کی سزارکھی گئی ۔نربھیاکے کیس میں بھی متعلقہ شق میں ترمیم کی گئی تھی اس میں زیادہ سے زیادہ سخت سزاکی تجویزمنظورہوئی اور سپریم کورٹ نے جدیدترمیم شدہ شق کی روشنی میں پھانسی کی سزاکی تصدیق کردی ۔۱۵سال قبل ۲۶نومبر۲۰۰۲کولوک سبھامیں اُس وقت کے نائب وزیر اعظم لال کرشن اڈوانی نے زانیوں کوسزائے موت دیے جانے کی تجویزپیش کی تھی لیکن اس وقت ان کی تجویزکی بہت مخالفت ہوئی تھی لیکن آج جب سپریم کورٹ کے ذریعے اسی سزاکی تصدیق ہوچکی ہے تو کسی بھی طرف سے مخالفت کی کوئی بھی آوازنہیں اٹھ رہی ،کیوں ؟اب زمانہ بہت آگے بڑھ چکاہے ،پندرہ سال گزرچکے ہیں ،افکارمیں حیرت انگیزتبدیلی رونماہوچکی ہے اوراسلام کابدسے بدتردشمن بھی نادانستہ طور پر اسی کی طرف قدم اٹھارہاہے جہاں اسلام اسے لے جاناچاہتاہے ۔اس تناظرمیں دیکھیںکہ آج طلاق ثلاثہ ،یکساں سول کوڈاورخواتین کے پردے کے متعلق اسلامی ہدایات پرپورے ملک میں ہنگامہ بپا کرنے ، تنقیدیں کرنے اوراسے ظلم سے تعبیرکرنے والے ایک دن اسی مقام پرپہنچ جائیں گے جواسلام کا اصل مقصودہےاورپھراس وقت اسلامی تعلیمات پراعتراض جتانے والے نام نہادروشن خیال لوگ خاموش بیٹھ جائیں گے جب ایک دن مسئلے کے حل کے لیے ہزارغوروفکرکے بعدعدالتیں بھی وہی فیصلے صادر کرناشروع کردیں گی جواسلام پہلے ہی صادرکرچکاہے۔یکساں سول کوڈاورطلاق ثلثہ کامعاملہ سپریم کورٹ میں پہنچ چکاہے ،حکومت ہندبھی طلاق ثلاثہ کےذریعے شریعت میں مداخلت کی خواہاں ہے اورممکن ہے کہ جلدہی اس سلسلے میں کوئی فیصلہ آجائے ،اس فیصلے سے مسئلہ حل ہونے کے بجائے اوربڑھ جائے گا اور پھرایک دن مجبورہوکرسپریم کورٹ وہی فیصلہ دے گی جواسلام دلواناچاہتاہے کیوںکہ انسانی عقل اپنے تمام ترتجربات ، مشاہدات اور مطالعات کے بعدجہاںپہنچتی ہے وہاں ہمارادین صدیوں پہلے پہنچ چکا ہوتا ہے ۔ دنیا میں جوبھی تخریب کاریاں اورجرائم ہورہے ہیں ان کااصل حل اسلامی تعلیمات میں ہی ہیں، آج نہیں توکل ان کا سدباب اسلامی تعلیمات سے ہی ہو گا،دنیاکی عدالتیں اورسیکولراذہان چاہے اسے اپنی عقل اور دانش کاکرشمہ قراردیں یااسے عصرحاضرکی مجبوری سمجھیں مگرواقعہ یہ ہے کہ وہ بالواسطہ طور پر اسلامی تعلیمات تک ہی پہنچ رہے ہیں، چاہے وہ اسلام کانام نہ لیںیانہ لیں۔

کہاں ہیں ہندتووادی اوراسلام مخالف عناصر؟ذراوہ بھی دیکھیں کہ اسلام دھیرے دھیرے ان کی شہ رگ تک پہنچ رہاہے ۔ پورے ملک کوہندتواکے رنگ میں رنگنے کے لیے ہرممکن کوشش کرنے والی بی جے پی حکومت،ملک بھرمیں چل رہی ہندتواکی لہر،۲۰۱۹کامرکزی الیکشن جیتنے کی تیاری،جولائی میں صدرجمہوریہ ہندکی کرسی پرآرایس ایس کے اہل کارکوبٹھانے کی تگ ودو،جگہ جگہ گائے کے نام پر مسلمانوں کاقتل ، ذبیحے یاچھوٹی چھوٹی باتوں پرمسلمانوں کی زندگی اجیرن کرنے والاماحول بنانے والے کیایہ سمجھ رہےہیں کہ وہ ملک سے اسلام کوباہرنکال دیں گے۔؟انہیں یادرکھناچاہیے کہ ظلم وبربریت ، ناانصافیوں اورامن وامان کے لیے ترس رہی دنیااب اپنی فطرت کی تلاش میں ہے اسی لیے دنیاوالے غیرمحسوس طور پر اسلام کی طرف بڑھ رہے ہیں۔ قانونِ قدرت ہے کہ انسان کو سکون فطری زندگی گزارنے سے ہی مل سکتاہے ۔خدانے انسان کاذہنی اورجسمانی شاکلہ اس طورپرتخلیق کیاہےکہ وہ زیادہ دنوں تک خلاف فطرت کام کرہی نہیںسکتا،تھک ہارکراسے فطرت کے سامنے سر جھکانا ہی ہے اورفطرت کااسلا م سے بڑاگہرارشتہ ہے ،ایسارشتہ کہ دونوں لازم وملزوم ہیں ۔ذہن سے ایک سوال جھانک رہاہے کہ کیاایسے حالات میں دشمن ،اسلام کی پناہ میں آجائے گا؟ ممکن ہے ایساہوجائے ، بس ہم اپنا رویہ بدل لیں اور خدا سے اپنے گناہوں کی معافی چاہیں۔

Comments Print Article Print
 PREVIOUS
NEXT 
About the Author: sadique raza

Read More Articles by sadique raza : 133 Articles with 82406 views »
hounory editor sunni dawat e islami (monthly)mumbai india
managing editor payam e haram (monthly) basti u.p. india
.. View More
09 May, 2017 Views: 464

Comments

آپ کی رائے