|
زندگی انسان کا سب سے مختصر اور سب سے طویل سفر ہے
زندگی ایک خواب ہے جو خوبصورت بھی ہے اور بھیانک بھی ہے
یہ زندگی غم بھی ہے، خوشی بھی ہے، راحت بھی ہے اذیت بھی ہے
زندگی کے کئی روپ ہیں یہ کبھی سراب ہے ، ہے کبھی گلاب، تو کبھی عذاب بھی ہے
گویا زندگی ایک مختصر لیکن ضخیم کتاب کا نام ہے
خواب سراب عذاب اور گلاب پر مشتمل زندگی کا نصاب ہے جِس کتاب کا قاری خاکی
انسان ہے
اِسے دیکھنا، پڑھنا، اِس پر غور کرنا، سمجھنا، جاننا ، سیکھنا اور کتابِ
حیات پہ عبور حاصل کرنا ہی انسان کا کام ہے
خود کوزندگی کے عذاب سے کیسے بچانا ہے ، زندگی کے خوابوں کو کس طرح خوبصورت
تعبیر دینا ہے اور اس گلشن حیات کو کھلتے مسکراتے مہکتے گلابوں کی سرزمین
کیسے بنانا ہے ، زندگی کی حقیقت کو کس طرح جاننا اور پانا ہے خواب زندگی کی
تعبیر کو کیسےحسین بنانا ہے زندگی کی بدصورتی کو مٹا کر کس طرح سجانا
سنوارنا اور خوبصورت بنانا ہے
زندگی کے دشوار گزار سفر کو کس طرح پر لطف اور خوشگوار بنانا ہے کتاب زندگی
کی حکمتوں سے کس طرح فیض اٹھانا اور زندگی کو صحیح معنوں میں زندگی بنانا
ہے
یہ سب انسان کے اپنے اختیار میں ہے یہ سب ہمارے ہاتھ میں ہے بشرطیکہ انسان
خود چاہے اور غور کرے تو کتاب زِیست خود غور و فکر کرنے والے اِنسان کی
رہنمائی کرتی ہے
اپنے اندر پوشیدہ حکمتیں خود آشکار کرتی ہے اور اس کے لئے شرط یہی ہے کہ
خود چاہا جائے آگے قدم بڑھایا جائے محنت، کوشش، لگن اور محبت سے ہر منزل پر
کامیابی حاصل کرنے کی سعی کی جائے
خالق کا حکم بھی یہی ہے کہ زمین و آسمان میں جو کچھ ہے اس پر غوروفکر کرو
اسی طرح انسان اپنے رب کو اپنے آپ کو اور اپنے مقام کو پہچان سکتا ہے
اور جب ایسا ہو جائے یعنی انسان
خود شناسا ہو جائے تو سمجھیں انسان نے کتاب زندگی پر دسترس حا صل کر لی اور
یہی انسان کی وہ کامیابی ہے جس سے بڑھ کر اور کچھ نہیں
اللہ تعالٰی ہمارے علم و حکمت میں اضافہ فرمائے اور ہم سب کو دونوں جہانوں
کی کامیابیوں کے راستے پر گامزن رہنے کی توفیق عطا فرمائے آمین
|