آپ سب نے بچپن میں اکثر و بیشتر بار اپنے بڑوں بزرگوں کی زبان سے یہ ضرور سنا ہوگا کہ عقل داڑھ بڑے ہو کر نکلتی ہے اور جب یہ نکلتی ہے تو بے حد تکلیف بھی ہوتی ہے۔
اس وقت بھی ہمارے ذہنوں میں ایک ہی سوال جنم لیتا تھا کہ کیا واقعی عقل داڑھ نکلنے کے بعد انسان میں عقل آجاتی ہے؟ اور کیا واقعی عقل داڑھ کا عقل سے کوئی تعلق بھی ہوتا ہے یا نہیں؟
تھرڈ مولرز کو 17 ویں صدی سے عام طور پر عقل داڑھ کے نام سے ہی جانا جاتا ہے اور اب 21 ویں صدی میں بھی لوگ اسے عقل داڑھ کا لفظ استعمال کرتے ہیں۔
عقل داڑھ عام طور پر ہمارے تمام دانتوں کے مقابلے میں سب سے تاخیر سے نکلتی ہے، جو عموماً 17 سے 25 سال کی عمر کے دوران باہر آتی ہے۔
اس داڑھ کو عقل داڑھ اس لئے کہا جاتا ہے کیونکہ یہ اس وقت نکلتی ہے جب انسان بالغ ہوجاتا ہے اور عمر کے اس حصے میں وہ پہلے سے زیادہ عقل و شعور رکھتا ہے، یہی وجہ ہے کہ تھرڈ مولر کو عام طور پر لوگ عقل داڑھ کہتے ہیں۔