سندھ کی وزیرِ صحت ڈاکٹر عذرا فضل پیچوہو کہتی ہیں کہ صوبے میں کورونا وائرس کی شرح میں اضافہ ہو رہا ہے، موجودہ حالات کے پیشِ نظر اِسکول کھولنا ابھی درست عمل نہیں۔
تفصیلات کے مطابق میڈیا ذرائع سے گفتگو کرتے ہوئے وزیرِ صحت سندھ ڈاکٹر عذرا فضل کا کہنا ہے کہ کورونا وائرس کی شرح 1.5 فیصد سے 3 فیصد تک بڑھ گئی ہے۔
اُنہوں نے کہا کہ موجودہ حالات میں کورونا کی دوسری لہر کی بھی پیش گوئی ہے، پرائمری اسکولوں کو کھولنے میں جلدی نہ کی جائے۔
وزیرِ صحت سندھ کا مزید کہنا ہے کہ اسکول کھولنے پر تحفظات ہیں، پرائمری اسکولوں کو کم سے کم ایک سے ڈیڑھ ماہ کا وقت دینا ضروری ہے۔
ڈاکٹر عذرا فضل پیچوہو کا یہ بھی کہنا ہے کہ صورتِ حال واضح ہونے پر ہی بچوں کو اسکول بھیجنا مناسب ہو گا۔
پاکستان میں کورونا وائرس کی مجموعی صورتحال بہتر ہے تاہم چند روز سے مختلف مقامات خاص طور پر سندھ اور بلوچستان میں کورونا کیسز کی تعداد میں اضافہ رپورٹ ہوا ہے۔