شہرِ کراچی کے 3 سرکاری کالجز میں کورونا وائرس کے کیسز سامنے آگئے۔
ڈائریکٹوریٹ آف کالجز نے کالجز میں کورونا وائرس کے کیسز منظرعام پر آنے کے بعد کہا کہ تینوں کالجز میں تعلیمی عمل کو رکوا دیا گیا ہے۔
تفصیلات کے مطابق ڈائریکٹوریٹ آف کالجز کے مطابق کورونا کے کیسز سرسید گورنمنٹ گرلز کالج ناظم آباد میں لیب اٹینڈنٹ، لیکچرر اور طالبہ میں وائرس کی تصدیق ہوئی ہے جبکہ گُلستان جوہر گورنمنٹ کالج بلاک 12 کے عملے میں بھی وائرس کی تشخیص ہوئی ہے۔
اس کے علاوہ کیماڑی کے سرکاری کالج میں بھی کورونا کیسز رپورٹ ہوئے ہیں۔
واضح رہے کراچی سمیت ملک بھر میں کورونا وائرس کے کیسز میں ایک بار تیزی سے اِضافہ ہورہا ہے، حکومت اور ماہرین کی جانب سے پاکستان میں کورونا کی دوسری لہر آنے کا خدشہ ظاہر کیا جا رہا ہے۔