کراچی اور لاہور کی فضا انتہائی آلودہ ہے، یو ایس ائیر کوالٹی انڈیکس نے رپورٹ جاری کر دی۔
یو ایس ائیر کوالٹی انڈیکس کی جانب سے کراچی اور لاہور کے فضائی معیار کے حوالے سے رپورٹ جاری کی گئی، جس میں بتایا گیا ہے کہ لاہور اور کراچی کی فضا بے حد آلودہ اور مضرِ صحت ہے۔
رپورٹ کے مطابق دنیا کے آلودہ ترین شہروں کی فہرست میں لاہور تیسرے نمبر پر جبکہ کراچی چوتھے نمبر پر ہے، یو ایس ائیر کوالٹی انڈیکس کے مطابق لاہور میں آلودہ زرات کی مقدار 227 پرٹیکیولیٹ میٹر ہے، جس کی وجہ سے حدِ نگاہ بھی متاثر ہو رہی ہے۔
یو ایس ائیر کوالٹی انڈیکس کی رپورٹ میں مزید یہ بھی بتایا گیا ہے کہ دنیا کے آلودہ ترین شہروں میں بلغاریہ کا دارلحکومت صوفیہ پہلے جبکہ بھارت کا دِلّی شہر فہرست میں دوسرے نمبر پر ہے۔
یاد رہے کہ 151 سے 200 درجے تک آلودگی مضرِ صحت جبکہ 201 سے 300 درجے تک انتہائی مضرِ صحت اور خطرناک قرار دی جاتی ہے، ایسی صورتحال میں شہریوں کو سانس لینے میں مشکل پیش آنے اور سانس کی بیماریوں میں مبتلا ہونے کا خدشہ ظاہر کیا گیا ہے تاہم کراچی اور لاہور کے شہریوں کو چاہیئے کہ ماسک کا استعمال یقینی بنائیں۔