صوبہ سندھ کے ضلع گھوٹکی میں کچرے میں آگ لگنے سے پُراسرار دھماکا، ایک رینجرز اہلکار سمیت پانچ افراد زخمی ہوگئے ہیں۔
تفصیلات کے مطابق صوبہ سندھ کے ضلع گھوٹکی میں پُراسرار دھماکا ہوا ہے، دھماکے کے نتیجے میں ایک رینجرز اہلکار سمیت پانچ افراد زخمی ہوگئے ہیں، پولیس ذرائع کے مطابق دھماکا گھوٹکی کے علاقے میرپور ماتھیلو میں اس وقت ہوا، جب نامعلوم افراد نے کچرے میں آگ لگائی۔
تاہم دھماکے کی اطلاع ملتے ہی پولیس اور ریسکیو کی بھاری نفری جائے حادثے پر پہنچی، دھماکے میں زخمی رینجرز اہلکار سمیت تمام زخمیوں کو فوری طبی امداد کے لئے اسپتال منتقل کر دیا گیا ہے۔
پولیس کا کہنا ہے کہ دھماکے کی نوعیت کا تعین کیا جا رہاہے اور بم ڈسپوزل اسکواڈ کی ٹیم بھی طلب کر لی گئی ہے۔
دوسری جانب ذرائع کا کہنا ہے کہ کچرے میں آگ سے ناکارہ آئل فلٹر پھٹا جس کے باعث دھماکا ہوا۔
واضح رہے کہ گذشتہ سال اگست میں شکار پور اور جیکب آباد میں رینجرز ہیڈکوارٹرز کو بم حملوں میں نشانہ بنایا گیا تھا۔