سیالکوٹ کے حلقے پی پی 38 میں ضمنی انتخاب جاری ہے، پنجاب اسمبلی کے حلقے پی پی 38 میں صبح شروع ہونے والی پولنگ کا عمل شام 5 بجے تک بنا کسی تعطل کے جاری رہنی تھی لیکن رات گئے ہونے والی تیز بارش کے باعث حلقے میں صبح تک جگہ جگہ پانی کھڑا ہے۔
بارش کے باعث پولنگ عملے کو بعض مقامات پر بہت زیادہ مشکلات کا سامنا ہے اور کئی جگہ تو پولنگ کا عملہ بارش کا پانی پولنگ اسٹیشن سے نکالنے میں مصروف ہے مزید یہ کہ اس حلقے کے خواتین کے پولنگ اسٹیشن نمبر 65 میں اب تک پولنگ کا عمل شروع ہی نہ ہو سکا۔
پولنگ نہ شروع ہونے پر پریزائڈنگ افسر کا کہنا ہے کہ بارش کے باعث کوئی خاتون پولنگ ایجنٹ پہنچ نہ سکی جس کی وجہ سے پولنگ کا عمل رکا ہو ا ہے۔
یہ نشست پاکستان مسلم لیگ (ن) کے رکن صوبائی اسمبلی خوش اختر سبحانی کے انتقال کے باعث خالی ہو گئی تھی اور اب ضمنی انتخابات میں مسلم لیگ (ن) کے طارق سبحانی اور پاکستان تحریک انصاف کے احس بریار میں کانٹے کا مقابلہ متوقع ہے۔