کچھوے اور خرگوش کی کہانی تو سب نے سنی ہوگی کہ کیسے کچھوے نے تیز رفتار خرگوش کو ریس میں ہرا دیا۔ لیکن جاپان کے ناریتا انٹرنیشنل ائیر پورٹ پر موجود ایک کچھوے نے اپنی سست رفتاری سے پانچ جہازوں کو اڑنے سے روک دیا۔
خبروں کے مطابق جہاز اڑان بھرنے کے لئے تیار ہی تھا کہ اچانک پائلٹ نے رن وے پر ایک کچھوے کو دیکھا اور ٹریفک کنٹرولرز کو بتایا۔ جس کے بعد عملہ کچھوے کو پکڑنے گیا۔ لیکن کچھوے میاں ان تمام باتوں سے بے خبر اتنی سست رفتاری سے سفر طے کیے جارہے تھے جس کی وجہ سے تقریباً پندرہ منٹ تک پانچ طیارے کچھوے صاحب کے ہٹنے کا انتظار کرتے رہے۔ بالآخر عملہ کچھوے کو پکڑنے میں کامیاب ہوگیا اور جہازوں نے اڑان بھری۔