بادل جم کر برسیں گے ۔۔ کراچی میں آج سے طوفانی بارش کی پیش گوئی، بارش کب تک رہے گی؟

کراچی میں گرمی کی تپش اور گرم ہوائیں گزشتہ شام سے چل رہی تھیں جو بحیرہ عرب میں موجود سائیکلون کا اثر تھا مگر اس کے بعد اب موسم میں تبدیلی ہوئی ہے، صبح سے کراچی کے مختلف علاقوں میں ٹھنڈی اور تیز ہوائیں چل رہی ہیں۔ شہری شدت سے انتظار کر رہے ہیں کہ کب کراچی میں تیز بارش ہو اور موسم کے مزاج میں ٹھنڈک آئے۔

محکمہ موسمیات کی پیشن گوئی کے مطابق: '' شہرِ قائد میں طوفانی بارش کے باعث سڑکیں اور گلیاں زیر آب آنے کا خدشہ ہے، بارش آج سے 2 اکتوبر تک ہوگی، بادل جم کر برسیں گے، طوفانی بارش کی بھی توقع ہے جس سے سمندر میں طغیانی کا خدشہ ہے جس کی وجہ سے ماہی گیروں کو آج سے 3 اکتوبر کے دوران سمندر میں نہ جانے کی ہدایت بھی کی گئی ہے۔ ''

محض کراچی ہی نہیں بلکہ سندھ بھر میں اربن فلڈنگ کا خطرہ ہے، بتایا یہ جا رہا ہے کہ عمارات جو خستہ حال ہیں وہ بارش کی شدت سے مسمار بھی ہوسکتی ہیں۔ لسبیلہ، سونمیانی، اورماڑا، پسنی، گوادر، تربت، جیوانی میں بھی طوفانی بارش اور اربن فلڈنگ کا خطرہ ہے۔

انتظامیہ کی جانب سے بارشوں سے نمٹنے کی تیاریوں کے دعوے کیے جارہے ہیں مگر دیکھنا یہ ہے کہ اگر کوئی ہنگامی صورتحال پیش آئی تو کس حد تک حکومت اس نقصان کی بھرپائی کرنے میں کامیاب ہوسکے گی۔

واضح رہے ٹھٹہ، بدین، دادو، ڈگری ،عمرکوٹ سمیت سندھ کے مختلف شہروں میں بھی گزشتہ رات گرج چمک کے ساتھ بارش ہوئی، کئی علاقوں میں بجلی کی فراہمی بھی معطل ہوئی۔