مداحوں کی سب سے پسندیدہ شوبز کی جوڑی سارہ خان اور فلک شبیر کے گھر گذشتی روز ننھے مہمان کی آمد ہوئی۔ دونوں میاں بیوی ایک بیٹی کے والدین بنے جس پر دنوں شخصیات انتہائی خوش دکھائی دیں۔
سوشل میڈیا پر گلوکار فلک شبیر کی ویڈیو وائرل ہو رہی ہے جس میں وہ اپنی ننھی بیٹی کے کانوں میں اذان دے رہے ہیں، ان کی وائرل ویڈیو نے مداحوں کو اپنا گرویدہ بنا دیا ہے۔
فلک شبیر اور سارہ خان نے اپنی بیٹی کا نام 'عالیانہ فلک' رکھا ہے۔
ویڈیو میں دیکھا جاسکتا ہے کہ فلک شبیر نومولود کو گود میں اٹھائے اذان دے رہے ہیں، اداکارہ سارہ خان نے ویڈیو شیئر کرتے ہوئے کیپشن میں قرآنی آیت بھی لکھی۔
اس سے قبل فلک شبیر نے مداحوں کو ربیع الاول کے چاند کی مبارک دیتے ہوئے لکھا تھا کہ ’آج اس بابرکت دن کے موقع پر اللّہ تعالیٰ نے ہمیں بیٹی کی رحمت سے نوازا۔
گلوکار نے خوشی کے اس موقع پر اللّہ تعالیٰ کا شُکر ادا کرتے ہوئے بتایا تھا کہ اُنہوں نے اپنی بیٹی کا نام ’عالیانہ فلک‘ رکھا ہے۔
اُنہوں نے اپنے مداحوں کی دُعاؤں اور محبت کے لیے اُن کا بھی شکریہ ادا کیا۔