یہ مثال تو آپ نے سُنی ہوگی کہ دینے والا جب بھی دیتا ہے تو چھپڑ پھاڑ کر دیتا ہے، ایسا ہی کچھ ہوا دبئی میں ایک پاکستانی ڈرائیور کے ساتھ جو راتوں رات ارب پتی بن گیا، کیسے؟ آیئے آپ کو بتاتے ہیں۔
غیر ملکی میڈیا کے مطابق دبئی میں مقیم 36 سالہ پاکستانی ڈرائیور جنید رانا پر قسمت کچھ اس طرح مہربان ہوئی کہ ایک معمولی سے ڈارئیور کی 50 ملین درہم ( 2 ارب 37 کروڑ پاکستانی روپے سے زائد ) کی لاٹری نکل آئی، جی ہاں 2 ارب 37 کروڑ کی لاٹری اور یوں یہ پاکستانی ڈرائیور راتوں رات اتنا امیر ہو گیا۔
یہ پاکستانی شخص جنید رانا دبئی کی نجی کمپنی میں 6 ہزار درہم ( 2 لاکھ سے زائد پاکستانی روپے) پر ماہانہ ڈرائیور کی نوکری کرتے ہیں جنہوں نے اپنی قسمت آزمائی کے لئے لاٹری خریدی اور یہ جان کر وہ حیران رہ گئے کہ انہوں نے متحدہ عرب امارات کی سب سے بڑی لاٹری جیت لی ہے۔
جنید کہا کہنا تھا کہ ''میں بہت خوشی محسوس کر رہا ہوں، جب میں نے اپنے گھر والوں کو بتایا تو وہ خوشی سے پاگل ہو گئے،'' انہوں نے مزید کہا کہ ''ابھی تک میں نے اس بات کا فیصلہ نہیں کیا ہے کہ میں اپنے خاندان کو یہاں بلا لوں یا پھر واپس گھر والوں کے پاس چلا جاؤں''۔