ضلع نارووال کے گاؤں لیسر کلاں میں بھارتی ساختہ مارٹر گولا برآمد ہونے کے بعد علاقے میں خوف و ہراس پھیل گیا۔
پولیس کے مطابق مقامی افراد نے ایک مشکوک گولہ دیکھ کر فوری طور پر پولیس کو اطلاع دی، جس پر پولیس کی نفری موقع پر پہنچ گئی اور علاقے کو حفاظتی تحویل میں لے کر بم ڈسپوزل اسکواڈ کو طلب کرلیا۔
بم ڈسپوزل اسکواڈ نے پیشہ ورانہ مہارت کے ساتھ کارروائی کرتے ہوئے مارٹر گولے کو کامیابی سے ناکارہ بنایا اور مزید جانچ کے لیے اپنی تحویل میں لے لیا۔
حکام کا کہنا ہے کہ برآمد ہونے والے بھارتی ساختہ مارٹر گولے کا وزن تقریباً ایک کلوگرام تھا۔ ماہرین کے مطابق اگر گولا پھٹ جاتا تو اس سے بڑے پیمانے پر جانی و مالی نقصان کا خدشہ تھا۔
واقعے کے بعد سیکیورٹی اداروں نے علاقے کا جائزہ لیا، جبکہ پولیس نے شہریوں کو ہدایت کی ہے کہ کسی بھی مشکوک یا دھماکا خیز شے کی صورت میں خود ہاتھ نہ لگائیں بلکہ فوری طور پر متعلقہ اداروں کو اطلاع دیں۔