بلیاں پالنے کا شوق اکثر لوگوں کو ہوتا ہے اور وہ جس جگہ آباد ہوجائیں اس جگہ سے ہمیشہ کے لیے مانوس ہوجاتی ہیں۔ آج ہم بات کریں گے چند بلیوں کی جن کی افسردہ کر دینے والی کہانیاں جان کر دنیا بھی حیران رہ گئی۔

بلی بھی ایک وفادار جانور ہے جو ایک بار اپنے مالک کی ہوجائے تو آخری وقت تک ساتھ نبھاتی ہے۔ چند بلیوں کی کہانیاں یہاں زیر غور ہیں۔

بیلگو روڈ کی بلی

سال 2015 میں روس کے شہر (بیلگو روڈ) میں ایک بلی بہت مشہور ہوگئی تھی۔ وہ روزانہ ایک گٹر کے ڈھکن کے اوپر بیٹھی ہوئی ملتی تھی۔ گزرتے ہوئے راہ گیر اس بلی کو کچھ نہ کچھ کھانے کی چیز دے دیا کرتے۔ یہ بلی سارا دن اسی ڈھکن پر بیٹھ کر گزار دیتی تھی۔

لوگ حیران تھے کہ یہ بلی یہاں بیٹھی رہتی ہے لیکن بعدازاں انہیں اس بلی کی حیرت انگیز کہانی معلوم ہوئی۔ یہ بلی ایک سال قبل ایک فیملی کے ساتھ رہتی تھی۔ وہ فیملی گھر چھوڑ کر چلی گئی لیکن اپنی پالتو بلی کو ساتھ لے کر نہیں گئی۔

وہاں کے مقامی افراد نے دیکھا کہ بلی ایک گاڑی کی پیچھے بھاگ رہی تھی جو اس فیملی کی کار تھی۔ بلی واپس آکر اس گھر کے آگے موجود مین ہول کے ڈھکن کے اوپر بیٹھ گئی۔ بلی کو انتظار تھا کہ گھر والے واپس آجائیں گے۔ سال گزر گیا، مگر وہ بلی ویسے ہی اس جگہ پر بیٹھی رہی۔

سربیا کی بلی

پھر وہیں ایک اور بلی نے اپنی وفاداری کی مثال سب کو دکھائی۔

سربیا سے تعلق رکھنے والے مفتی معمر زرکولک اس وقت مقبول ہوئے جب ان کی وفات کے بعد ان کی پالتو بلی ان کی قبر کے اوپر گھنٹوں بیٹھی رہی۔

مفتی معمر سربیا کے ان اسلامی رہنماؤں میں سے ایک تھے جنہیں سربیا سمیت سرجن ریجن میں ایک اہم اسلامی رہنما کے طور پر پسند کرتے تھے۔

ان کی پالتو بلی اس وقت سب کی توجہ کا مرکز بن گئی جب ان کی وفات کے بعد ان کی قبر پر پالتو بلی آکر گھنٹوں بیٹھی رہی۔ مفتی معمر کی بلی ان کی میت کے بھی قریب رہنا چاہتی تھی، جبکہ کئی بار ہٹانے کے باوجود بھی بلی قبر کے پاس سے نہیں ہٹ رہی تھی۔ مفتی معمر اس بلی سے بہت پیار کرتے تھے۔

جکارتہ کی بلی

جکارتہ سے تعلق رکھنے والے ایک شخص کے مرنے کے بعد اس کی پالتو بلی نہ صرف روئی بلکہ قبرستان میں اس کی قبر پر ایک سال تک بیٹھی رہی۔ یہ واقعہ انڈونیشیا کے صوبہ وسطی جاوا کا ہے۔

قبرستان جانیوالے ایک شخص نے اسے اپنے ساتھ گھر لے جانے کی بھی کوشش کی اور وہ اپنی کوشش میں کامیاب بھی ہوگیا لیکن بلی اگلے دن واپس قبرستان آگئی اور اپنے مالک کی قبر پر بیٹھ گئی۔

یہ بلی کھانے پینے کیلئے اپنے مالک کے گھر بھی جاتی ہے اور پھر واپس قبر پر آجاتی ہے۔قبرستان میں بھی اسے لوگ خوراک اور پانی دیدیتے ہیں لیکن وہ قبر سے نہیں ہٹتی، وہیں زمین پر لوٹتی رہتی ہے اور رات کو وہیں سوتی ہے۔

ایک شخص نے بتایا کہ پہلے ہم سمجھے کہ یہ بے گھر ہے اور مدد چاہتی ہے لیکن جب ہم اسے اپنے گھر لے آئے تو یہ واپس قبرستان چلی گئی۔ میں روزانہ ہی قبرستان آتا ہوں اور اسے وہیں پاتا ہوں۔ بعض مرتبہ ایسا بھی ہوا کہ یہ بلی 2 گھنٹے کیلئے غائب رہی لیکن اس کے بعد اسے قبر پر ہی پایا۔

ایک مرتبہ میں اس کے پیچھے پیچھے چلتا رہا تو دیکھا کہ وہ اسی گھر میں گئی ہے جہاں یہ پلی بڑھی تھی۔ وہیں اس نے کھانا کھایا اور واپس قبرستان چلی گئی۔