گزشتہ برس سیالکوٹ میں کام کرنے والے سری لنکن شہری پریانتھا کمارا کو توہینِ رسالت کے الزام میں انتہائی بربریت کے ساتھ قتل کیا گیا جس نے پاکستان کو ہی نہیں پوری دنیا کو جھنجھوڑ کر رکھ دیا تھا۔ گوجرانوالہ کی انسداد دہشت گردی کی خصوصی عدالت میں جاری پریانتھا قتل کیس کا فیصلہ کل سنا دیا گیا۔
عدالت نے 6 مجرمان بشمول محمد حمیر، تیمور احمد، محمد ارشاد، علی حسنین، ابو طلحہ اور عبدالرحمٰن کو 2 بار سزائے موت کے علاوہ 2,2 لاکھ روپے بطور ہرجانہ مقتول کے گھر والوں کو ادا کرنے کا حکم دیا جبکہ 9 مجرموں روحیل امجد، محمد شعیب، احتشام زیب، عمران ریاض، ساجد امین، ضیغم مہدی، علی حمزہ، لقمان حیدر اور عبدالصبور کو عمر قید اور 2,2 لاکھ روپے پریانتھا کے ورثاء کو دینے کا حکم دیا گیا۔72 افراد کو 2 سال کی قید سنائی گئی۔ علی اصغر نامی شخص کو 5 سال قید کی سزا دی گئی جبکہ بلاول ولد ندیم کو بری کردیا گیا۔
جنگ نیوز کے مطابق عدالت نے کیس کی سماعت 1 ماہ اور 4 دنوں میں مکمل کی۔ کیس میں نابالغ افراد سمیت 80 ملزمان پیش کیے گئے جن میں 18 سال سے کم عمر افراد کا ٹرائل الگ سے کیا گیا۔ پراسیکیوشن ٹیم نے گزارش کی تھی کہ سزائے موت صرف بالغ افراد کو دی جائیں۔