کراچی میں شدید سردی کے دوران اچانک گیس کی فراہمی معطل یا پریشر انتہائی کم ہونے سے شہریوں کو شدید مشکلات کا سامنا کرنا پڑا۔ پیر کے روز شہر کے مختلف علاقوں میں بغیر پیشگی اطلاع گیس بند ہونے پر گھریلو اور کمرشل صارفین متاثر ہوئے۔
متاثرہ علاقوں میں گلستانِ جوہر، گلشنِ اقبال، اسکیم 33، ملیر، سعود آباد، نارتھ کراچی، پی آئی بی کالونی، ناظم آباد، شادمان ٹاؤن، سرسید ٹاؤن، کاٹھور، گارڈن، عثمان آباد، غازی نگر، بوہرہ پیر، اختر کالونی، منظور کالونی، چنیسر گوٹھ، گڈاپ، اورنگی ٹاؤن اور لیاقت آباد سمیت دیگر علاقے شامل ہیں۔ شہریوں کے مطابق گیس کی بندش یا کم پریشر کے باعث کچن میں کام کرنا ناممکن ہو گیا اور کئی خاندانوں کو ہوٹلوں سے کھانا منگوانا پڑا۔
شہریوں نے شکایت کی ہے کہ ایس ایس جی سی نے بھی کے۔الیکٹرک کی طرح بغیر اطلاع گیس کی لوڈشیڈنگ شروع کر دی ہے، جس سے خاص طور پر گھریلو صارفین شدید متاثر ہو رہے ہیں۔
دوسری جانب ایس ایس جی سی ذرائع کا کہنا ہے کہ دو گیس فیلڈز بند ہونے کے باعث گیس کی کمی کا سامنا ہے، تاہم جلد صورتحال بہتر ہونے کی توقع ہے۔