پودے ماحول کو کتنا ٹھنڈا رکھتے ہیں یہ جاننا ہو تو گرمی کے موسم میں دو منٹ کسی سایہ دار درخت کے نیچے کھڑے ہوجائیں۔ البتہ چند پودے ایسے بھی ہیں جو گھر کے اندر کے ماحول کو بھی بہت حد تک ٹھنڈا بنا سکتے ہیں۔ University of Vermont Extension کے مطابق پودے گھر کے اندر کا درجہ حرارت 10 ڈگری تک کم کرسکتے ہیں۔ آج ہم آپ کو چند ایسے پودوں کے بارے میں بتائیں گے جو آپ کے کمرے کو بغیر اے سی بھی ٹھنڈا ماحول فراہم کریں گے۔

منی پلانٹ

منی پلانٹ پاکستان کے موسم کے لحاظ سے کافی موزوں ہے اور گرمی کے موسم میں تیزی سے پھلتا پھولتا ہے۔ یہ پودا گھر کے اندر بھی رکھا جاسکتا ہے۔ منی پلانٹ کو کسی کونے میں رکھ دیں اور جیسے جیسے یہ بڑھتا جائے رسی سے اسے دیواروں پر باندھتے جائیں۔ کمرے کی گرمی کم اور ٹھنڈک بڑھ جائے گی۔

ایلو ویرا

ایلو ویرا کو بڑھنے کے لئے دھوپ چاہیے ہوتی ہے جس کی وجہ سے اسے کھڑکی کے پاس رکھا جاسکتا ہے۔ اس کے اندر موجود پانی کی بڑی مقدار کی وجہ سے یہ پودا بھی آس پاس کا ماحول ٹھنڈا رکھتا ہے۔

ربر پلانٹ

یہ پودا گہرے کتھئی یا میرون رنگ کا ہوتا ہے اور اس کے پتے موٹے ہوتے ہیں۔ جتنا اس کے پتے موٹے اور زیادہ تعداد میں ہوں گے اتنا ہی یہ پودا ارد گرد کا ماحول ٹھنڈا کرے گا۔

اسپائیڈر پلانٹ

اسپائیڈر پلانٹ کو بہت زیادہ توجہ کی ضرورت نہیں ہوتی اور یہ کمرے کو بھی ٹھنڈک بخشتا ہے اس کے علاوہ یہ کمرے سے مضر گیسوں کا اثر بھی زائل کرتا ہے۔

موتیا کا پودا

موتیا کے پودے بھی کمرے کے اندر رکھے جاسکتے ہیں اس کے بہت سارے پتے کمرے کو ٹھنڈا تو رکھتے ہی ہیں جبکہ اس کے پھول کمرے کو تازگی اور خوشبو بھی عطا کرتے ہیں۔ یہ تمام پودے گھر کے درجہ حرارت کو کم رکھنے میں کافی مددگار ہیں۔ کمرے کا ماحول بغیر اسے سی کے ٹھنڈا اور تازگی بھرا رکھنا ہو تو انھیں ضرور گھر لے آئیں۔