اکثر اوقات جب ہمارا پیارا ہم سے بچھڑ جاتا ہے تو ہمیں خوابوں میں بھی وہ نظر آتے ہیں، ایسے میں ہمارے تاثرات اور جذبات بھی کچھ ایسے ہوتے ہیں جو کہ خود ناقابل بیان ہوتے ہیں۔
ہماری ویب ڈاٹ کام کی اس خبر میں آپ کو اسی حوالے سے بتائیں گے کہ موت کے بعد آپ کے پیارے آپ کے خوابوں میں کیوں آتے ہیں؟
موت ایک ایسا عمل ہے جس سے ہر ایک کو گزر کرنا پڑتا ہے، لیکن جب کسی کا پیارا جس سے بہت زیادہ قربت ہو، جس کے بغیر رہنا ممکن نہ ہو، بچھڑ جائے تو وہ ہر لمحے یاد ضرور آتا ہے۔
ایسے میں انسان ہر لمحہ اسی پیارے کے بارے میں سوچتا رہتا ہے، حتیٰ کہ کئی بار تو یاد میں سکتے میں بھی چلا جاتا ہے، لیکن ایک کیفیت ایسی بھی ہوتی ہے جب انسان اپنے پیارے کو اپنے خوابوں میں دیکھتا ہے۔
یہ کیفیت اُس حد تک چھو جاتی ہے جب انسان اپنے پیارے کو ہر وقت ذہن میں سوچ رہا ہوتا ہے تو خوابوں میں بھی دیکھتا ہے۔ جب آپ ذہن میں کسی چیز کو سوار کر لیتے ہیں تو ہر جگہ وہی چیز دکھائی دیتی ہے۔
یہی وجہ ہے کہ آپ کا پیارا بھی آپ کو خوش و خرم دکھائی دیتا ہے یا پھر تکلیف میں۔ اب اس میں بھی صورتحال یہاں تبدیل ہو جاتی ہے کہ اگر آپ کو آپ کا پیارا کسی اچھی جگہ پر دکھائی دیتا ہے تو آپ مطمئن محسوس کرتے ہو، اور اگر وہ تکلیف میں ہوتا ہے تو آپ بھی روحانی طور پر گہرائی میں چلے جاتے ہو۔
پیرانارمل اتھارٹی نامی ویب سائٹ کے مطابق اگر آپ کے خوابوں میں آپ کا مرحوم پیارا آتا ہے تو عین ممکن ہے کہ آپ کسی مسئلے کا شکار ہوں، اور اس میں آپ شدید ذہنی تکلیف سے بھی دوچار ہوں۔
خواب دراصل انسان کی سوچ اور ذہنیت کی ترجمانی بھی کر رہے ہوتے ہیں، جب ایک انسان کسی بڑے سانحے سے یا واقعے سے گزرتا ہے تو اس کا گہرا اثر اس پر پڑتا ہے، یہی وجہ ہے کہ وہ نیند میں بھی اسی حوالے سے سوچتا ہے۔
اسے اس طرح سمجھیں جب کبھی نوجوانوں کے امتحان ہوتے ہیں تو اس حد تک امتحان کو اپنے اوپر حاوی کر لیتے ہیں کہ رات کو سوتے وقت بھی اچانک جب آنکھ کھلتی ہے تو امتحان سے متعلق کچھ نا کچھ زبان پر ہوتا ہے۔
دوسری جانب مرحوم کا خواب میں آنا اس بات کی طرف بھی اشارہ ہے کہ آپ دماغی طور پر پریشان ہیں۔