کراچی کے علاقے طارق روڈ کے قبرستان کی دیواروں پر نجی پینٹ کمپنی کی جانب سے نامناسب تشہیر لکھی گئی ہے جس کی خبر سوشل میڈیا پر آنے کے بعد صارفین غم و غصے کا اظہار کر رہے ہیں۔
قبرستان جو لوگوں کی آخری آرام گاہ ہوتی ہے وہاں کی دیواروں پر پینٹ کمپنی کی جانب سے نامناسب جملے لکھے گئے جس کی تصویر سماجی رابطے کی ویب سائٹ ٹوئٹر پر شئیر ہوئی ہے۔
طارق روڈ میں قبرستان کی دیوار پر نجی پینٹ کمپنی نے اشتہاری مہم کے تناظر میں اپنا نعرہ یہی تو رنگ ہے زندگی کا لکھ ڈالا۔
کچھ اسی طرح کے الفاظ رواں برس مارچ کے مہینے میں شہر کراچی میں واقع المحسن سرد خانے کی دیوار پر بھی لکھے دکھائی دیئے تھے۔
سوشل میڈیا صارفین نے پینٹ بنانے والی کمپنی کی جانب سے شہر کی دیواروں کو رنگ و روغن کرکے صاف ستھرا کرنے کی حمایت تو کی، لیکن قبرستان اور مردہ خانوں پر اس طرح کے سلوگن لکھنا غلط قرار دیا۔