یہ بات تو حقیقت ہے کہ غلطی سے کوئی انسان مبرا نہیں مگر پروفیشنل غلطیاں کبھی کبھی ایسا نقصان بھی کردیتی ہیں جن کی تلافی ممکن نہیں ہوتی۔ ایسا ہی واقعہ پیش آیا بھارت کی ریاست کیرالہ سے تعلق رکھنے والی ہرشینا کے ساتھ جن کے پیٹ میں 5 سالوں تک قینچی پھنسی رہی۔ یہ قینچی ان کے پیٹ میں کیسے پہنچی اس کی وجہ ڈاکٹرز کی ہولناک غلطی تھی۔

5 سال درد سہتے گزار دیے

ہرشینا کہتی ہیں کہ 2017 میں بچے کی پیدائش کے سلسلے میں ان کا آپریشن کیا گیا تو اس کے بعد انھیں مسلسل پیٹ میں درد رہنے لگا۔ ہوتے پوتے ان کا درد بڑھتا ہی گیا اور یوں ہی 5 سال کا عرصہ گزر گیا۔ پھر اچانک ان کا درد ناقابلِ برداشت ہوگیا۔ ڈاکٹر کو دکھانے اور ٹیسٹ کروانے کے بعد انھیں پتہ چلا کہ ان کے پیٹ میں ایک تیز دھار چیز موجود ہے جسے آپریشن کر کے ہی نکالا جاسکتا ہے۔

ہرشینا کی شکایت پر وزیر صحت کا نوٹس

جب ان کا آپریشن کیا گیا تو ان کے پیٹ سے ایک درمیانے سائز کی تیز دھار قینچی برآمد ہوئی۔ ہرشینا کا کہنا ہے کہ آپریشن کے دوران ڈاکٹروں کی غفلت کی وجہ سے انھوں نے پانچ سال تک اذیت برداشت کی۔ کیرالا کے وزیر صحت نے ہرشینا کی شکایت پر فوری نوٹس لیتے ہوئے متعلقہ ڈاکٹروں کے خلاف سخت کارروائی اور تحقیقات کی ہدایت دے دی ہے۔