امریکی ریاست پنسلوانیا میں ایک افسوسناک واقعے میں 11 سالہ بچے نے مبینہ طور پر موبائل گیم کھیلنے سے منع کرنے پر اپنے والد کو گولی مار کر ہلاک کر دیا۔ پولیس کے مطابق 42 سالہ ڈگلس ڈیٹس گھر میں مردہ حالت میں پائے گئے جن کے سر پر گولی لگنے کے زخم تھے۔
ابتدائی تحقیقات کے بعد پولیس نے مقتول کے بیٹے کلیٹن کو گرفتار کر کے اس کے خلاف قتل کا مقدمہ درج کر لیا ہے۔ غیر ملکی میڈیا کے مطابق یہ واقعہ بچے کی سالگرہ کے دن رات کے وقت پیش آیا جب گھر میں چند گھنٹے قبل سالگرہ کا کیک کاٹا گیا تھا۔
مقتول کی اہلیہ نے پولیس کو بتایا کہ انہیں زور دار آواز اور جلنے جیسی بو محسوس ہوئی اور بستر کے قریب شوہر کو بے ہوش پایا۔ اس دوران بچے نے خود اعتراف کیا کہ اس نے والد کو مارا کیونکہ وہ اسے سونے کے لیے کہہ کر موبائل گیم چھین چکے تھے۔
پولیس کے مطابق بچے نے بتایا کہ اسے والد کی الماری کی چابی مل گئی جس سے اس نے سیف کھولا، پستول نکالی، گولیاں ڈالی اور والد کے قریب جا کر فائر کیا۔ والدہ کو گھر میں اسلحہ کے موجود ہونے کا علم تھا مگر چابی کا علم نہیں تھا۔