جنگ سے متاثرہ شام میں ایک نوجوان لڑکی نے تعلیم کی تکمیل پر اپنے سبزی فروش باپ کے ہاتھ چوم کر لوگوں کو جذباتی کردیا۔
ویڈیو میں دیکھا جاسکتا ہے کہ المدینہ یونیورسٹی کی فیکلٹی آف ایجوکیشن سے فارغ التحصیل ہونے والے درجنوں افراد جشن منا رے ہیں اور رزان یوسف سلیمان بھی انہیں میں سے ہے۔
نوجوان خاتون رزان یوسف سلیمان یونیورسٹی کا گریجویشن گاؤن پہنے اور سر پر کالی ٹوپی لئے ہوئے ہیں، ان کے بائیں ہاتھ میں سفید گلابوں کا گلدستہ ہے۔ دائیں ہاتھ میں ایک سرٹیفکیٹ ہے۔
رزان کو پیدل آتے ہوئے دیکھا جا سکتا ہے وہ اپنے والد کے سبزیاں فروخت کرنے والے خیمے میں آتی ہے۔ گلاب کے پھولوں کا گلدستہ لاکر اپنے والد کو پیش کرتی ہے۔
ایک کیک بھی لاتی ہے جس پر لکھا ہوا ہے ’’بابا میری سب سے پیاری تعریف ہے‘‘ ۔ رزان اپنے والد سے والہانہ انداز میں گلے ملتی ہے۔ اپنے والد کو بار بار چومنا شروع کردیتی ہے۔
بیٹی کے پیار کو دیکھ کر باپ بھی اپنی بیٹی کو شفقت سے گلے لگاتا ہے جبکہ بازار میں لوگ بیٹی کے اس طرح والد کیلئے پیار کے اظہار کو تعجب سے دیکھ رہے ہیں۔
دو منٹ سے بھی کم وقت کی ایک ویڈیو کے ذریعہ اس نوجوان شامی خاتون نے گزشتہ دو دنوں میں سوشل میڈیا پر بڑے پیمانے پر توجہ حاصل کرلی ہے۔سوشل میڈیا پر آنے کے بعد اس ویڈیو کو ہزاروں لوگوں نے دیکھا اور ویڈیو پر سیکڑوں افراد نے تبصرے لکھے اور کہا کہ اس ویڈیو نے ان کو رلادیا ہے۔