سابق وزیراعظم عمران خان کی گرفتاری کے بعد تحریک انصاف کے احتجاج کے پیش پنجاب میں فوج طلب کرلی گئی، وفاق نے پنجاب کی درخواست منظور کرلی۔
پنجاب میں امن وامان کے قیام کے لیے پاک فوج تعینات کرنے کا فیصلہ کیا گیا ہے، وفاقی وزارت داخلہ نے پنجاب میں فوج کی تعیناتی کی منظوری دے دی۔
فوج کو لاہور، ملتان، راولپنڈی، فیصل آباد سمیت دیگر اضلاع میں تعینات کیا جائے گا، پنجاب میں فوج تعینات کرنے کے لئے محکمہ داخلہ پنجاب نے سمری وزارت داخلہ کو بھجوائی تھی۔
فوج کو آئین کے آرٹیکل 245 کے تحت امن و امان کی صورتحال بہتر بنانے کے لیے بلایا گیا ہے، محکمہ داخلہ فوج کی 10 کمپنیوں کو پنجاب کے مختلف اضلاع میں تعینات کریگی۔
پاک فوج کی دس کمپنیاں امن وامان قائم کرنےکے لیے ضلعی انتظامیہ کے ساتھ مل کر کام کریں گی ،وفاقی وزارت داخلہ نے پنجاب میں فوج کی تعیناتی کا نوٹیفکیشن جاری کردیا ہے۔
یاد رہے کہ گزشتہ روز عمران خان کی گرفتاری کے بعد تحریک انصاف کے کارکنوں نے ملک کے مختلف شہروں میں احتجاج کے دوران حساس مقامات پر توڑ پھوڑ بھی کی تھی جس کی وجہ سے پنجاب میں فوج کو تعینات کیا جارہا ہے۔