گزشتہ رات آندھی اور بارش سے ہونے والے نقصانات کی رپورٹ جاری کردی گئی، خیبرپختونخوا میں طوفانی بارشوں سے جاں بحق ہونے والوں کی تعداد 27 ہوگئی۔
صوبائی ڈیزاسٹر مینجمنٹ اتھارٹی (پی ڈی ایم اے) کے مطابق اب تک بارش اور آندھی سے مختلف واقعات میں 146 افراد کے زخمی ہونے کی اطلاعات ہیں۔ تیز بارش اور طوفان کے باعث 69 گھروں کو جزوی نقصان پہنچا جبکہ 27 افراد جاں بحق ہوئے۔
اسی طرح پنجاب میں مجموعی طور پر 10 واقعات رپورٹ ہوئے، مختلف حادثات میں 3 بچیوں سمیت 5 افراد جاں بحق ہوئے جبکہ 17 کے زخمی ہونے کی اطلاعات سامنے آئیں۔ بارش کے باعث دیوار گرنے سے 2 بکریاں بھی ہلاک ہوئیں۔
ڈی جی پی ڈی ایم اے عمران قریشی نے اس حوالے سے بتایا کہ پی ڈی ایم اے صوبہ بھر کی انتظامیہ سے مکمل رابطہ میں ہے۔ صوبائی کنٹرول روم سے تمام تر صورتحال کی مانیٹرنگ جاری ہے۔
سیکریٹری ریلیف کے مطابق متاثرین کیلئے امدادی سامان کی فراہمی کو یقینی بنانے کیلئے بھی اقدامات کیے جارہے ہیں۔