پاکستان کے وزیراعظم شہباز شریف نے آئی ایم ایف کے ساتھ معاہدے پر دوست ممالک کا شکریہ ادا کرتے ہوئے کہا ہے کہ ’میں سعودی عرب، یو اے ای اور چین کا شکریہ ادا کرتا ہوں جنہوں نے پرخلوص تعاون کیا۔‘
جمعرات کو قوم سے خطاب کرتے ہوئے انہوں نے کہا کہ ’سعودی ولی عہد محمد بن سلمان، یو اے ای کے صدر شیخ محمد بن زاید النہیان اور چینی صدر نے پاکستان کو معاشی مشکلات سے نکالنے میں اہم کردار ادا کیا۔‘ان کا کہنا تھا کہ ’سابق حکومت نے آئی ایم ایف کے پروگرام کو توڑا۔ ہم نے ہمت نہیں ہاری اور آئی ایم ایف کا پروگرام بحال کیا۔ پاکستان کے ڈیفالٹ کا خطرہ ٹل چکا ہے اور ان کی ناپاک سازش مٹی میں مل چکی ہے۔‘انہوں نے کہا کہ گذشتہ برس اپریل میں پاکستان کے عوام نے انہیں اتحادی حکومت سنبھالنے کی ذمہ داری سونپی تھی جسے وہ اگلے ماہ چھوڑ رہے ہیں۔’اگست 2023 میں نگراں حکومت کو معاملات سپرد کر دیں گے۔ ہم نے ریاست بچانے کے لیے اپنی سیاست کی قربانی دی۔‘وزیراعظم کا کہنا تھا کہ اتحادی حکومت نے 15 کے مختصر وقت میں نوجوانوں کو روزگار اور لوگوں کو مہنگائی کے خلاف ریلیف دینے میں کوئی کسر نہیں چھوڑی۔شہباز شریف کا کہنا تھا کہ انہوں نے اپنے دور حکومت میں ’پاکستان کے مفادات کی راہ میں بچھائی گئی بارودی سرنگیں صاف کیں۔ بدترین انتظامی، کرپشن اور سازشوں کی آگ کو بجھایا۔‘’یہ سب کچھ کھو جانے سے کچھ حاصل ہونے کا وقت تھا۔ معاشی تباہی سے نکل کر معاشی استحکام کی طرف لوٹ آنے کا وقت تھا۔‘آئی ایم ایف کے ساتھ ہونے والے معاہدے کے حوالے سے انہوں نے کہا کہ ’سفارتی سطح پر وزیر خارجہ بلاول بھٹو کی کوششیں قابل ستائش ہیں۔ وزیر خزانہ اسحاق ڈار اور آرمی چیف عاصم منیر کی کاوشوں کو بھی سراہتا ہوں۔‘وزیراعظم نے کہا کہ ’وقت آ گیا ہے کہ ہمیں اپنے پیروں پر کھڑے ہو کر کھویا ہوا مقام حاصل کرنا ہے۔ عظیم مقصد کے لیے معاشی بحالی کا جامع قومی پلان تیار کر لیا گیا ہے۔ سپیشل انوسٹمنٹ کونسل تشکیل دی گئی ہے جس نے اپنا کام شروع کر دیا ہے۔‘