قاہرہ: مصر کے ایک گھر میں موبائل فون چارجر کی وجہ سے ہونے والا شارٹ سرکٹ گھر کے تمام افراد کی جان لے گیا۔
غیر ملکی خبر رساں ایجنسی کے مطابق مصر کے دارالحکومت قاہرہ کے جنوب میں واقع فیصل کے علاقے میں ریسکیو اداروں کو گھر میں آگ لگنے کی اطلاع موصول ہوئی۔
ریسکیو اداروں ںے موقع پر پہنچ کر گھر میں لگی آگ بجھائی جس نے تمام گھر کو اپنی لپیٹ میں لے لیا تھا۔ آگ بجھانے کے بعد معلوم ہوا کے گھر کے تمام ہی افراد جھلس کر جاں بحق ہو چکے ہیں تاہم ایک نوجوان جس نے تیسری منزل سے چھلانگ لگا دی تھی اسے زخمی حالت میں اسپتال منتقل کیا گیا۔
یہ بھی پڑھیں:
تحقیقات پر معلوم ہوا کہ گھر کے سربراہ اپنا موبائل فون چارجنگ پر لگا کر سو گئے تھے اور رات گئے چارجر کی وجہ سے ہونے والے شارٹ سرکٹ سے آگ لگ گئی جس نے پورے گھر کو اپنی لپیٹ میں لے لیا۔
گھر کے سربراہ اور ان کی اہلیہ نے موقع پر ہی دم توڑ دیا تھا جبکہ بچے اسپتال منتقلی کے دوران جاں بحق ہو گئے۔ حادثے میں گھر کے سربراہ سمیت 4 افراد جاں بحق ہوئے۔