صوبہ خیبر پختونخوا کے ضلع خیبر میں باڑہ بازار کے تحصیل کمپاؤنڈ میں دو خود کش حملہ آوروں نے داخل ہونے کی کوشش کی۔خیبر پختونخوا کے پولیس آئی جی اختر حیات نے بتایا کہ جمعرات کو دو خود کش حملہ آوروں نے تحصیل کمپاؤنڈ کے سامنے اور عقب سے داخل ہونے کی کوشش کی جنہیں پولیس نے جوابی کارروائی کر کہ ہلاک کر دیا۔پولیس نے عمارت کو گھیرے میں لے کر سرچ آپریشن شروع کر دیا ہے جبکہ زخمیوں کو حیات آباد میڈیکل کمپلیکس پشاور منتقل کر دیا گیا ہے۔خیال رہے کہ دو دن قبل منگل کو پشاور میں فرنٹیئر کانسٹیبلری (ایف سی) کی گاڑی کے قریب خودکش دھماکہ ہوا تھا جس میں آٹھ افراد زخمی ہوئے تھے۔یہ دھماکہ حیات آباد فیز 6 میں ہوا تھا۔ایس پی کینٹ وقاص رفیق نے ایف سی کی گاڑی پر ہونے والے دھماکے کو خودکش قرار دیتے ہوئے کہا تھا کہ ’خودکش حملہ آور نے گاڑی کو نشانہ بنایا اور گاڑی سے ٹکرانے کے بعد خود کو دھماکے سے اُڑا دیا۔‘انہوں نے مزید کہا تھا کہ ’ایف سی کی گاڑی فیز 6 میں واقع ایف سی ہیڈ کوارٹرز سے جا رہی تھی کہ اسے نشانہ بنایا گیا۔‘