لاہور۔9فروری (اے پی پی):پاکستان مسلم لیگ (ن) کے قائد محمد نواز شریف نے انتخابات میں تمام جیتنے والی جماعتوں کو مل کر حکومت بنانے کی دعو ت دیتے ہوئے کہا ہے ہم سب جماعتوں اور آزاد امیدواروں کے مینڈیٹ کا احترام کرتے ہوئے ملک کو مشکلات سے نکالنے کے لیے سب کو ساتھ بیٹھنے کی دعوت دیتے ہیں، ملک بار بار انتخابات کرانے کا متحمل نہیں ہو سکتا،یہ اکیلا مسلم لیگ (ن) کا نہیں سب کا پاکستان ہے،استحکام کے لئے کم از کم دس سال چاہئیں۔ان خیالات کا اظہارا نہوں نے پارٹی کے مرکزی سیکرٹریٹ ماڈل ٹائون میں پارٹی کارکنوں سے خطاب کرتے ہوئے کیا ۔اس موقع پر شہباز شریف،مریم نواز،اسحاق ڈار، عطا اللہ تارڑ، مریم اورنگزیب سمیت دیگر رہنما بھی موجود تھے ۔ماڈل ٹائون آمد پر نواز شریف اور مریم نواز کا پرتپاک استقبال کیا گیا اور ان کی گاڑی پر گل پاشی کی گئی،اس موقع پر آتش بازی کا شاندار مظاہرہ بھی کیا گیا۔
نواز شریف نے خطاب کر تے ہوئے کہا کہ میں آپ کی آنکھوںمیں ایک چمک دیکھ رہاہوں ،یہ چمک کہہ رہی ہے میرے پاکستان کوسنوار دو،ہماری زندگیوںمیں روشن تبدیلی آنی چاہیے،یہ چمک پاکستان کو ایک بہت خوبصورت ملک دیکھنا چاہتی ہے۔انہوں نے کہا کہ میں آپ کو اپنی طرف سے شہباز شریف کی طرف سے اور پارٹی کے تمام رہنمائوں کی طرف سے مبارکباد دیتا ہوں کہ اللہ کے فضل و کرم سے انتخابات میں پاکستان مسلم لیگ (ن)سب سے بڑی جماعت بن کر ابھری ہے،مسلم لیگ (ن) سنگل لارجسٹ پارٹی ہے،ہمارا فرض ہے کہ اس ملک کو بھنور سے نکالا جائے،ہمارا فرض بنتا ہے کہ اس ملک کو بھنور سے نکالنے کی تدبیر کریں،ہم نے پہلے بھی ملک کومشکلات سے نکالا ہے،آج بھی نکالنے کا اہتمام کر رہے ہیں،ہم سب جماعتوں کے مینڈیٹ کا دل سے احترام کرتے ہیں ،جو فرد واحد جیتا ہے،چاہے کوئی آزاد ہے ہم ان کا بھی احترام کرتے ہیں،انکو بھی دعوت دیتے ہیں کہ پاکستان کے لئے آئو ہمارے ساتھ بیٹھو،ہمارا ایجنڈا صرف اور صرف ایک خوشحال پاکستان ہے جو ہم نے پہلے بھی کر کے دکھایا ہے،آپ جانتے ہیں کہ ہم نے کون کون سے منصوبے بنائے،کس طرح سے ملک کو مالی مشکلات سے نکالا کس طرح سے معیشت کو ٹھیک کیا آپ کو سب معلوم ہے ،پاکستان ایک وقت خوشحال ہوتا چلا جارہا تھا آپ کو یہ بھی معلوم ہے،ملک کی دفاعی صلاحیت کے لئے ہم نے اپنا کردار ادا کیا،چاہے معاشی ہو ،دفاعی ہو،معاشرتی نظام ہو سب کی بہتری کے لئے کام کیا اور بھرپور خدمت کا ریکارڈ قائم کیا،ہمارا ایک ٹریک ریکارڈ ہے،ہم اپنے سینے میں پاکستان کا درد رکھتے ہیں ،ہمیں جو مینڈیٹ ملا ہے ضروری ہے دوسری جماعتیں بھی ساتھ بیٹھ کر حکومت قائم کریں اور پاکستان کو اس بھنور سے نکالیں ۔نواز شریف نے کہا کہ ہم بار بار ملک میں انتخابات کرانے کے متحمل نہیں ہو سکتے،سب کو رواداری کے ساتھ بیٹھ کر ملک کو مشکلات سے باہر نکالنا چاہیے۔انہوں نے کہا کہ یہ آپ کی زندگیوںکا سوال ہے ،بچوں کے زندگیوں اور مستقبل کا سوال ہے ، یہ کوئی معمولی بات نہیں ہے اسے سنجیدگی سے لینا چاہیے،اس قوم کی امنگوں کے مطابق پورا اترنا چاہیے،تب ہم اس بھنور سے باہر نکلیں گے،استحکام کے لئے کم از کم دس سال چاہئیں،میں بار بار کہہ رہا ہوں سب کو مل جل کر بیٹھنا ہوگا اور بیٹھ کر سارے معاملات کو طے کرنا ہوگا اور پاکستان کو اکیسویں صدی میں لے کرجانا ہوگا،اگر ہم کوتاہیاں نہ کرتے تو شاید آج پاکستان منفرد مقام حاصل کر چکا ہوتا،وہ مومینٹم جو ہم نے 1990میں بنایا تھا اگر وہ قائم رہتا تو آج پاکستان دنیا کی بہت بڑی طاقت ہوتا،ہم نیوکلیئر پاور بنے تو اس وقت پاکستان پر اللہ تعالی کی خاص رحمت ہوئی تھی،یہ کہا جا رہا تھا کہ پاکستان اقتصادی اور دفاعی طو ر پر بھی مضبوط ہے،آج کوئی میلی آنکھ سے پاکستان کی طرف نہیں دیکھ سکتا کیونکہ نیوکلیئر پاور ہے ۔نواز شریف نے کہا کہ اگر انتخابات میں ہمیں پورا مینڈیٹ ملتا ہم اکثریتی پارٹی بنتے تو حکومت بناتے تو بہت خوشی کی بات ہوتی ،لیکن اس کے باوجود ہم باقی جماعتوں کو دعوت دیتے ہیں وہ ہمارے ساتھ شامل ہو جائیں ہمارے ساتھ چلیں کیونکہ ہمارے پاس اکثریت نہیں ہے کہ حکومت بنا سکیں۔انہوں نے بتایا کہ میں نے شہباز شریف کی قیادت میں پارٹی رہنمائوں کو ذمہ داری دی ہے کہ وہ اس پر پیشرفت کریں اور آج ہی آصف علی زرداری،مولانا فضل الرحمن،خالد مقبول صدیقی سے ملاقات کریں،ایم کیو ایم کے ساتھ ملاقات کر کے اپنی سوچ سے آگاہ کریں کہ پاکستا ن کے حالات کیا تقاضا کرتے ہیں،ہم سب مل کر بھنور سے کشتی کو نکالیں۔انہوں نے کہا کہ میں چاہتا ہوں ملک اتنا خوشحال ہو کہ عوام کو بجلی اور گیس کا بل ادا کرتے ہوئے،گاڑی اور موٹر سائیکل میں پیٹرول ڈلواتے ہوئے بوجھ محسوس نہ ہو،بچوں کی سکول کی فیس ادا کرتے ہوئے بوجھ محسوس نہیں ہونا چاہیے ، پاکستان میں بہترین روزگار ہونا چاہیے،خوشحالی ہو،ان شا اللہ روشنیاں پھر لوٹیں گی۔بد امنی ،بے روزگاری کا خاتمہ ہوگا،غریب کا چولہا جلے گا،قوم کی حالت بدلے گی،قوم سکھ کا سانس لے سکے گی،ہم چاہتے ہیں ہمارے تعلقات دنیا کے ساتھ بہتر ہوں،اپنے ہمسایوں کے ساتھ بہتر تعلقات ہوں،ہم تعلقات بہتر کریں گے اور تمام مسائل حل کریں گے۔نواز شریف نے مزید کہا کہ اپنی پارٹی کے کامیاب ہونے والے لوگوں کو مبارکباد دیتا ہوں اور تاکید کرتا ہوں کہ آپ نے سیاست کو عبادت سمجھ کر کرنا ہے،حلقے کی عوام کی خدمت کرنی ہے،عوام کے مسائل کو حل کرنا ہے، بیروزگاری کے خاتمے کے لئے حکومت کا بھرپور ساتھ دینا ہے ۔انہوں نے کہا کہ ہمیں مرکز کے ساتھ پنجاب میں بھی اکثریت مل گئی ہے،پنجاب میں بھی ہم سنگل لارجسٹ پارٹی ہیں،مرکز میں خدمت کریں گے جو پورے ملک کی خدمت ہو گی،پنجاب میں بھی عوام کی خدمت کریں گے۔نواز شریف نے کہا کہ یوتھ کے لئے شہباز شریف کی بڑی قابل قدر خدمات ہیں،یہ یوتھ کے لئے لیپ ٹاپ خرید رہے ہیں،آرڈر دے دیا ہے،اچھے سکول بنائیں گے، وظائف دیں گے،ہسپتالوںمیں مفت ادویات دیں گے۔