اسلام آباد۔26فروری (اے پی پی):ایچ بی ایل نے بورے والا میں نئی کمپنی ایچ بی ایل زرعی سروسز کا پیرکو باقاعدہ آغازکردیا ہے۔ یہ پاکستان کی سٹریٹجک ترجیحات اور آغا خان ڈویلپمنٹ نیٹ ورک (اے کے ڈی این) کے وژن کے عین مطابق ہے۔ترجمان ایچ بی ایل زرعی سروسز نے یہاں جاری بیان میں کہا کہ ایچ بی ایل زرعی سروسز، ایچ بی ایل کی مکمل ملکیتی ماتحت کمپنی ہے جو پاکستان میں زراعت کے شعبے کو فروغ دینے کے لئے خصوصی خدمات فراہم کرنے والی اپنی نوعیت کی اولین کمپنی ہے۔ایچ بی ایل زرعی سروسز کا مقصد ضروری وسائل اور تجربے کی بنیاد پر مفید مشورے فراہم کرکے زرعی ویلیو چین کے ذریعے پیداواری صلاحیت، کارکردگی اور منافع میں اضافہ کرنا اور کاشتکاروں کو بااختیار بنانا ہے۔ پائیدار ترقی اور ماحولیاتی مسائل پر توجہ مرکوز کرتے ہوئے ایچ بی ایل زرعی سروسز ذمہ دارانہ زرعی طریقوں کو فروغ دینے کے لئے کام کرے گی۔ترجمان نے بتایا کہ ایچ بی ایل سٹیٹ بینک آف پاکستان اور ریگولیٹرز کا مشکورہے کہ انہوں نے اس ذیلی ادارے کے افتتاح کے ذریعے بینک پر اعتماد اور بھروسہ کیا۔ کمپنی کی افتتاحی تقریب میں صارفین، ریگولیٹرز اور بینک کے سینئر ایگزیکٹوز نے شرکت کی۔تقریب کے مہمان خصوصی ڈپٹی گورنر سٹیٹ بینک ڈاکٹر عنایت حسین تھے۔ایچ بی ایل کے چیئرمین سلطان علی الانا نے خطاب کرتے ہوئے کہا کہ 2004 میں بینک کی نجکاری کے بعد سے ہم زرعی شعبے کی ترقی اور پیشرفت کے پروگراموں پر فعال طور پر عملدرآمد کررہے ہیں۔ ایچ بی ایل گروپ آج معیشت کے اس اہم شعبہ کے لیے مالیاتی خدمات فراہم کرنے والا واحد سب سے بڑا ادارہ ہے جس سے 350,000 سے زائد کسانوں کا براہ راست تعلق ہے۔ ایچ بی ایل زرعی سروسز کے قیام اور آغاز کے ساتھ انشاء اللہ ہم ڈیروں کے ذریعے کسانوں کی دہلیز پر زرعی پیداوار کی خریداری اور ذخیرہ کرنے کی سہولت فراہم کرنے کے ساتھ مشاورت اور ان پٹ خدمات بھی فراہم کریں گے۔کسانوں کے لئے قائم خصوصی ڈسٹری بیوشن اور سروسز سینٹرز سے ملک بھر میں غذائی تحفظ اور آمدن میں اضافے کو یقینی بنایا جائے گا۔ ایچ بی ایل کے صدر اور سی ای او محمد اورنگزیب نے پائیدار یت کے لئے بینک کی غیرمتزلزل وابستگی پر زور دیتے ہوئے کہا کہ پاکستان کا زرعی منظر نامہ نازک موڑ پر ہے اگرچہ زراعت ہماری معیشت میں ریڑھ کی ہڈی کی حیثیت رکھتی ہے، لیکن ترقی اور خوشحالی کو آگے بڑھانے کے لیے اس کی صلاحیت کو ابھی تک مکمل طور پر بروئے کار نہیں لایا جاسکا ہے۔ایچ بی ایل نے طویل عرصے سے معاشی و سماجی ترقی اور پھلتی پھولتی زرعی معیشت کے درمیان باہمی تعلق قائم کیا ہے۔ ایچ بی ایل زرعی سروسز امید کی کرن بن کر سامنے آئی ہے جو مثبت تبدیلی اور ملک بھر میں غذائی تحفظ کو فروغ دینے کے ہمارے عزم کی عکاس ہے۔ ایچ بی ایل زرعی سروسز کے سی ای او عامر عزیز نے کہا کہ یہ منفرد منصوبہ ایچ بی ایل کو معاشی طور پر ہر اہم شعبے میں ویلیو چینز کو بہتر بنانے میں قائدانہ کردار ادا کرنے کا موقع فراہم کرے گا۔