لاہور۔2مارچ (اے پی پی):نگران وفاقی وزیر برائے انسانی حقوق خلیل جارج نے سنٹرل پولیس آفس لاہورمیں آئی جی پنجاب ڈاکٹر عثمان انور سے ملاقات کی اورپنجاب میں اقلیتوں کے حقوق کے تحفظ سمیت سکیورٹی امور پر تبادلہ خیال کیا ۔
خلیل جارج کے وفد میں پاسٹر عمران افضل، شوکت عاشق، کلیم یونس، غلام رسول اور دیگر افراد شامل تھے ۔ اس موقع پر ڈی آئی جی ویلفیئر اینڈ فنانس غازی محمد صلاح الدین، اے آئی جی آپریشنز اسد اعجاز ملہی اور ایس ایس پی آپریشنز لاہور علی رضا بھی موجود تھے ۔آئی جی پنجاب نےبتایا کہ پولیس میثاق سنٹرز کے قیام سے اب تک 40ہزار سے زائد اقلیتوں کو خدمات فراہم کر چکی ہے،مسیحیوں سمیت دیگراقلیتی کمیونٹی کے پولیس افسران اور اہلکار پنجاب پولیس میں شاندار خدمات انجام دے رہے ہیں، پنجاب پولیس اقلیتوں کے تمام مقدس پروگرامز اور مذہبی مقامات کو بھرپور سکیورٹی فراہم کرتی ہے، سانحہ جڑانوالہ کے بعد پنجاب پولیس نے بین المذاہب ہم آہنگی کے فروغ کے لئے قائدانہ کردار ادا کیاہے۔میثاق سنٹرز کا مسیحی افسران پر مشتمل عملہ ترجیحی بنیادوں پر اقلیتوں کے مسائل حل کر رہا ہے۔ انہوں نے کہاکہ پنجاب اقلیتوں کے حوالے سے محفوظ ترین صوبہ ہے، اقلیتوں کے حقوق کے تحفظ کےلئے میثاق سنٹرز کے قیام سمیت پنجاب پولیس کے دیگر فلاحی اقدامات کو سراہتے ہیں۔ آخر میں نگرن وفاقی وزیر اور آئی جی پنجاب کے درمیان سووینئرز کا تبادلہ بھی ہوا۔