اسلام آباد۔2مارچ (اے پی پی):قومی کمیشن برائے وقار نسواں (این سی ایس ڈبلیو) اورپاکستان پاورٹی ایلیویشن فنڈ( پی پی اے ایف) کے اشتراک سے قومی خواتین کانفرنس 4 مارچ کو نیشنل لائبریری اسلام آباد میں ہوگی۔ چیئر پرسن این سی ایس ڈبلیو نیلو فر بختیار کانفرنس کی مہمان خصوصی ہوں گی جبکہ پی پی اے ایف کے چیف ایگزیکٹو آفیسر نادر گل بریچ قومی معیشت میں کردار ادا کرنے کیلئے خواتین کو بااختیار بنانے میں سول سوسائٹی ، سرکاری اور نجی شعبے کے درمیان تعاون کی اہمیت پر روشنی ڈالیں گے۔
اس کانفرنس میں حکومتی ، عالمی ماہرین ، ترقیاتی شعبہ ، سول سوسائٹی کی تنظیموں ، نوجوانوں اور ماہرین تعلیم شرکت کریں گے ۔یہ کانفرنس ایک خوشحال پاکستان کے لیے خواتین کو بااختیار بنانے کے لیے دونوں اداروں کے مشترکہ وژن کی عکاسی کرتی ہے۔ یہ کانفرنس ایک متحرک فورم کے طور پر کام کرے گی جہاں معاشرے میں خواتین کے کردار کو آگے بڑھانے کے لیے بامعنی گفتگو کی جا سکے۔ نوجوانوں کی خواہشات اور تخلیقی صلاحیتوں کے جشن میں جڑواں شہروں کے خواتین کالجوں کی طالبات مختلف مقابلوں میں حصہ لیں گی۔اس کانفرنس میں قومی بیانیے ‘پیغام پاکستان’ اور ‘دختران پاکستان’ پر بھی روشنی ڈالی جائے گی، جو اتحاد، امن، سماجی ہم آہنگی اور خواتین کو بااختیار بنانے کے اقدامات کو فروغ دیتے ہیں۔قومی کمیشن برائے وقار نسواں اور پی پی اے ایف کے درمیان باہمی تعاون پروان چڑھ رہا ہے،قومی خواتین کانفرنس خواتین کی نئی نسل کو اپنے مقاصد کے حصول کےلئے بے خوفی سے آگے بڑھانے اور پاکستان کے معاشی اور سماجی تانے بانے میں اپنا حصہ ڈالنے کی ترغیب دینے کے لیے تیار ہے۔ ایک ایسے مستقبل کا اشارہ ہے جہاں خواتین نہ صرف شریک ہیں بلکہ قومی ترقی اور خوشحالی کی داستان میں رہنما ہیں۔