اسلام آباد۔5مارچ (اے پی پی):نیشنل ڈیزاسٹر مینجمنٹ اتھارٹی(این ڈی ایم اے) کی جانب سے آفات اور ہنگامی صورتحال سے نمٹنے کے لیے قبل از وقت تیاری اور اقدامات کے تسلسل کو جاری رکھتے ہوئے قومی سطح کی دو روزہ فرضی مشقوں کا انعقاد کیا گیا۔ فرضی مشقیں پیر 4 مارچ2024 کو نیشنل ڈیزاسٹر مینجمنٹ اتھارٹی کے ہیڈ کوارٹرمیں شروع ہوئیں جو منگل 5 مارچ کو اختتام پذیر ہوگئیں۔
فرضی مشقوں کا مقصد موسم بہار اور ابتدائی موسم سرما کے دوران ممکنہ ہنگامی صورتحال سے نمٹنے کی تیاری کو یقینی بنانا تھا۔ ترجمان این ڈی ایم اے کے مطابق مشقوں میں اہم متعلقہ اداروں بشمول صوبائی ڈیزاسٹر مینجمنٹ اتھارٹیز، سٹیٹ ڈیزاسٹر مینجمنٹ اتھارٹی، گلگت بلتستان ڈیزاسٹر مینجمنٹ اتھارٹی، ایمر جنسی سروسز، محکمہ موسمیات پاکستان، واپڈا، سپارکو،این ایچ اے، مسلح افواج، اسلام آباد انتظامیہ، ریسکیو1122، اقوام متحدہ ایجنسیز، فلاحی اداروں کے نمائندگان نے بھر پورشرکت کی۔مشقوں کے دوران تمام متعلقہ اداروں کو قدرتی آفات سے نمٹنے کی تیاریوں کے جائزہ کے لیے موقع فراہم کیا گیا۔ تمام متعلقہ اداروں کی جانب سے قدرتی آفات سے نمٹنے اور خطرے سے دوچار علاقوں کی حفاظت کو یقینی بنانے کے علاوہ بین الاقوا می اداروں کے ساتھ معاونتی دائرہ کار میں اضافے کے لیے بھی یہ مشقیں اہم کردار ادا کریں گی۔ قدرتی آفا ت سے نمٹنے کے لیے تمام متعلقہ اداروں کے مابین موثر رابطے اور معاونت کی اہمیت پر بھی زور دیا گیا۔ مشقوں کے دوران شرکاء کی جانب سے علاقائی اور قومی سطح کی آفات سے نمٹنے کے لیے اپنی حکمت عملی اور منصوبوں کو عمل میں لایا گیا۔قدرتی آفات اور ہنگامی حالات کی متعدد صورتوں بشمول خشک سالی، آتشزدگی، جھیلوں کی ٹوٹنے کے باعث آنے والے سیلاب(GLOF)، لو /ہیٹ ویو اور صنعتی آتشزدگی کو فرضی مشقوں کا حصہ بنایا گیا۔ ان فرضی مشقوں کا انعقاد آفات سے نمٹنے کے لیے متعلقہ اداروں کے مابین موثر اور بروقت رابطے اور اجتماعی اقدامات میں معاون ثابت ہو گا۔فرضی مشقوں کے اختتامی سیشن میں تما م شرکا ء نے قدرتی آفات سے نمٹنے کے لیے تیاری اور بر وقت اقدامات کے لیے این ڈی ایم اے کی جانب سے پیش کئے گئے پلیٹ فارم کو سراہتے ہوئے اپنی آراء اور تجاویز بھی پیش کیں تا کہ مستقبل میں ممکنہ قدرتی آفات اور ہنگامی صورتحال سے نمٹنے کے لیے موثر لائحہ عمل مرتب کیا جا سکے۔