لاہور۔6مارچ (اے پی پی):وزیر اعلی پنجاب مریم نواز شریف نے کہا ہے کہ عوام کو ان کی دہلیز پر سہولیات کی فراہمی ہمارا مشن ہے،رمضان نگہبان پیکیج سے پنجاب کے تین کروڑ سے زائد لوگ مستفید ہوں گے،صرف 9 روز میں عوام کو ریلیف دینے کے لئے رمضان پیکیج تیار کر کے وعدوں کی تکمیل شروع کر دی،ہر ضلع میں رمضان بازار بھی لگائے جائیں گے،ذخیرہ اندوزوں کے ساتھ سختی سے نمٹا جائے گا، نواز شریف کا ایجنڈا اور مشن عوام کو ریلیف فراہم کرنا ہے۔انہوں نے ان خیالات کا اظہار بدھ کے روز ایک پریس کانفرنس سے خطاب کرتے ہوئے کیا۔وزیر اعلی مریم نواز شریف نے کہا کہ رمضان نگہبان پیکج تیا ر کے کے اپنی پہلی تقریر میں کئے گئے وعدوں کی تکمیل شروع ہو گئی ہے،26 فروری کو حلف اٹھانے کے بعد صرف9 روز میں عوام کو ریلیف دینے کے لئے رمضان پیکیج تیار کیا،اس حوالے سے سابق وزیر اعظم محمد نواز شریف نے مکمل رہنمائی کی۔انہوں نے کہا کہ قائد نواز شریف کا ایجنڈا اور مشن عوام کو ریلیف فراہم کرنا اورغریب کا حق اسے تکلیف دیئے بغیر اس کی دہلیز پر پہنچانا ہے،عوام کو اب قطاروں میں کھڑا نہیں ہونا پڑے گا،پیکج کی تیاری میں پنجاب کے تمام محکموں نے ٹاسک کے مکمل ہونے میں بھرپور ساتھ دیا جس پر میں تمام اضلاع کی انتظامیہ اور پنجاب انفارمیشن ٹیکنالوجی بورڈ کی مشکور ہوں۔مریم نواز نے کہا کہ رمضان نگہبان پیکیج سے پنجاب کے تین کروڑ سے زائد لوگ مستفید ہوں گے،بی آئی ایس پی اور نادرا کے ڈیٹا کو کلب کر دیا ہے،آنے والے دنوں میں پنجاب حکومت ساڑھے 12 کروڑ عوام کا ڈیٹا اکٹھا کرے گی۔انہوں نے کہا کہ وقت کی کمی کی وجہ سے بلک میں خریداری کرنا پڑی،رمضان پیکیج کے ہیمپر میں کوالٹی کا خاص خیال رکھا گیا ہے،ایک ہیمپر میں10 کلو آٹا، 2 کلو گھی،2 کلو چینی، 2 کلو چاول اور2 کلو بیسن ہے،اعلی کوالٹی کا گھی،آٹا، چینی،چاول اور بیسن اس ہیمپر میں شامل کیا گیا ہے۔وزیر اعلی پنجاب نے کہا کہ کوالٹی کنٹرول پر چیک اینڈ بیلنس رکھا گیا ہے،ضلعی انتظامیہ اور پنجاب فوڈ اتھارٹی کو آٹے کی ملوں پر بٹھایا جہاں پیکنگ ہو رہی ہے،وہاں وہ کوالٹی کا خیال رکھ رہے ہیں،جو سیمپل منظور ہوئے صرف اس کی اجازت دی گئی،غیر معیاری پراڈکٹ تیار کرنے والی چار ملوں کو سیل بھی کیا گیا ہے،ضلعی انتظامیہ سے کہا ہے کہ وہ ہیمپرز کو کھول کر چیک کریں۔انہوں نے کہا کہ پیکج کی تقسیم کے میکنزم میں پی آئی ٹی بی نے بہت معاونت فراہم کی،ڈیلیوری میکنزم مکمل طور پر ڈیجیٹلائز ہے،پی آئی ٹی بی نے اس بارے میں ایک مخصوص ایپلی کیشن تیار کی ہے جس سے مستحق افراد مستفید ہوں گے۔مریم نواز نے کہا کہ پیکج کی تقسیم کے لیے مختلف ڈیپارٹمنٹس کے لوگوں کو شامل کیا گیا ہے،یونین کونسل،محلوں کی سطح پر ڈیلیوری ٹیموں کو تقسیم کیا گیا ہے اور پی آئی ٹی بی کی ایپلی کیشن ڈیلیوری ٹیموں کے لئے ہے۔انہوں نے کہا کہ ڈیلیوری ٹیموں کو کسی ناخوشگوار واقعہ سے بچنے کے لئے پولیس کی سیکورٹی بھی فراہم کی گئی ہے۔انہوں نے مزید کہا کہ5 ہزار تھیلے کیو آر کوڈ کے ساتھ فراہم کئے گئے ہیں،ہیمپرز کی تقسیم کے حوالے سے تمام ڈیٹا لائیو اکٹھا کیا جا رہا ہے، 6.5 ملین ہیمپرز کی تقسیم کا مکمل ڈیجیٹل ریکارڈ موجود ہوگا،شفافیت اور معیار کو برقرار رکھنے کے لئے مانیٹرنگ بھی کی جا رہی ہے،مانیٹرنگ ٹیمیں ہیمپرز کی تقسیم سے متعلق عوام سے بھی معلومات لیں گی۔وزیر اعلی پنجاب نے کہا کہ سی ایم مریم نواز کے نام سے ہیلپ لائن 080002345 قائم کی گئی ہے،جس سے72 گھنٹے میں عوام کی شکایات کو حل کیا جائے گا۔انہوں نے کہا کہ عوام اس نمبر پر کال کر کے رمضان پیکیج سے متعلق شکایت یا فیڈ بیک دے سکتے ہیں۔انہوں نے کہا کہ ہر ضلع میں رمضان بازار بھی لگائے جائیں گے جہاں عوام کو رعایتی نرخوں پر اشیا دستیاب ہوں گی۔مصنوعی مہنگائی کے حوالے سے بات کرتے ہوئے وزیر اعلی پنجاب نے کہا کہ پرائس کنٹرول پر پوری توجہ ہے،اس وقت پنجاب حکومت کے پاس پرائس کنٹرول کا کوئی ڈیپارٹمنٹ نہیں ہے تاہم پرائس کنٹرول کا مکمل نظام تیار کیا جائے گا۔انہوں نے کہا کہ پنجاب میں موجود گوداموں کو ضلعی انتظامیہ کے ساتھ رجسٹر ہونا چاہئے،ضلعی انتظامیہ کو ہدایات دی گئی ہیں کہ پرائس لسٹ پر عمل درآمد ہونا چاہئے۔مریم نواز نے کہا کہ پرائس لسٹ کی خلاف ورزی پر گزشتہ روز46 ہزار چھاپے مارے گئے، 4.2 ملین روپے کے جرمانے ہوئے،133 ایف آئی آرز ہوئی ہیں اور 236 گرفتار ہوئے، پرائس کنٹرول سے متعلق زیرو ٹالرینس ہے،ذخیرہ اندوزوں کو جرمانے بھی ہوں گے، گرفتاریاں بھی ہوں گی اورایسے عناصر کے ساتھ سختی سے نمٹا جائے گا۔