اسلام آباد۔6مارچ (اے پی پی):”چین کی اقتصادی ترقی اور پاکستان کے لئے مواقع” کے عنوان سے راؤنڈ ٹیبل کانفرنس کا انعقاد کیا گیا۔ بدھ کو کانفرنس میں پاکستانی سیاسی شخصیات، چینی اور پاکستانی کاروباری اداروں کے نمائندوں، ماہرین اور سکالرز اور مین سٹریم میڈیا کے سربراہان سمیت 40 سے زائد افراد نے شرکت کی۔
چینی حکومت کی 2024 کی ورک رپورٹ کی بنیاد پر اجلاس میں شرکاء نے چین کی اقتصادی ترقی اور چین پاک اقتصادی راہداری کے “اپ گریڈ ورژن” کی تعمیر جیسے موضوعات پر تبادلہ خیال کیا ۔کانفرنس کے شرکاء نے اظہار خیال کرتے ہوئے کہا کہ سی پیک کے پہلے مرحلے میں انفراسٹرکچر کو بہتر بنایا گیا جس سے ملک میں براہ راست روزگار کے مواقع بھی پیدا ہوئے جبکہ دونوں ممالک کو اب زراعت، سائنس اینڈ ٹیکنالوجی، سمال انڈسٹریز کی اپ گریڈیشن اور عوامی روابط کے فروغ کے لئے مؤثر اقدامات کی ضرورت ہے۔راؤنڈ ٹیبل کانفرنس سے پاکستان میں چینی سفارتخانہ کے پولیٹیکل سیکرٹری وینگ شینگ یی اور سابق نگران وفاقی وزیر صحت ڈاکٹر ندیم جان نے بیلٹ اینڈ روڈ انیشیٹو کے تحت سی پیک سمیت پاکستان اور چین کے درمیان مختلف شعبوں میں جاری منصوبوں اور ان کے مثبت اثرات سے متعلق اظہار خیال کیا۔