اسلام آباد۔6مارچ (اے پی پی):نیشنل ڈیزاسٹر مینجمنٹ اتھارٹی (این ڈی ایم اے)نے ملک کے مختلف علاقوں میں بارشوں اور برف باری کے باعث لینڈ سلائیڈنگ اور سڑکیں بند ہونے کے علاوہ بعض مقامات پر سیلابی صورتحال پیدا ہونے کے امکان ظاہر کرتے ہوئے احتیاطی اقدامات سے متعلق ایڈوائزری جاری کر دی۔
ترجمان این ڈی ایم اے کے مطابق بلوچستان کے بیشتر علاقے ابھی بھی مغربی ہوائوں کے زیر اثر ہیں، یہ سسٹم 6 مارچ سے بالائی علاقوں تک پھیلنے کا امکان ہے۔ بلوچستان کے مغربی حصوں میں ہلکی سے درمیانی بارش کی توقع ہے۔ گلگت بلتستان، کشمیر اور پوٹھوہار کے علاقے میں تیز ہوا /آندھی کے ساتھ ہلکی سے درمیانی بارش اور پہاڑوں پر برف باری کی توقع ہے۔ملک کے زیادہ تر حصوں میں بنیادی طور پر سرد اور خشک موسم کی توقع ہے۔ 8 مارچ سے 10 مارچ کے دوران ملک کے زیادہ تر حصوں میں ابر آلود موسم کی توقع ہے، وسطی اور جنوبی پنجاب کے چند مقامات پر بارش کے ساتھ ساتھ پاکستان کے شمالی حصوں میں برف باری کی توقع ہے۔ اسی طرح 10 مارچ سے 12 مارچ کے دوران بلوچستان کے جنوبی اور شمالی حصوں یعنی کیچ، گوادر، لسبیلہ، کوئٹہ، قلات اور خضدار میں بارش-ہوا /آندھی کی توقع ہے۔ کے پی کے کے مغربی /بالائی حصوں اور کشمیر میں ہوا /آندھی کے ساتھ بارش کی توقع ہے۔ ملک کے باقی حصوں میں خشک موسم کی توقع ہے۔بالائی کے پی، مری، گلیات، کشمیر اور جی بی میں لینڈ سلائیڈنگ کا خدشہ ہے، لہذا سیاحوں کو غیر ضروری سفر سے گریز کرنے اور دوران سفر موسمیاتی حالات سے باخبر رہنے کی ہدایت کی گئی۔ کے پی کے شمالی حصوں یعنی شانگلہ، مالم جبہ، دیر اوپر، چترال، گلگت بلتستان، آزاد جموں و کشمیر اور بلوچستان کے کچھ حصوں میں درمیانی سے شدید برف باری کی توقع ہے ۔ برف باری سے سڑکوں کی عارضی بندش ہو سکتی ہے۔علاوہ ازیں بالائی علاقوں یعنی سوات، اپر دیر، اپر کوہستان، چترال، ہنزہ اور کوئٹہ، چاغی اور کیچ میں بلوچستان کے نالوں میں فلیش سیلاب کا امکان ہے۔ گوادر، لسبیلہ، خضدار، قلات اور قلعہ عبد اللہ میں بارشوں سے اربن فلڈنگ کا بھی امکان ہے۔