اسلام آباد۔7مارچ (اے پی پی):وزیراعظم محمد شہباز شریف نے سعودی عرب کے ولی عہد اور وزیراعظم شہزادہ محمد بن سلمان بن عبدالعزیز السعود کی جانب سے وزارت عظمیٰ کا منصب سنبھالنے پر نیک خواہشات اور دعاؤں پر ان کا شکریہ ادا کیا ہے۔
جمعرات کو سماجی رابطہ کی ویب سائٹ ایکس پر اپنے ٹویٹ میں انہوں نے کہا کہ پاکستان اور سعودی عرب کے درمیان گہرے تعلقات باہمی احترام، مذہبی اور ثقافتی وابستگی اور مشترکہ اقدار پر مبنی تاریخی بندھنوں میں بندھے ہیں ۔انہوں نے کہا کہ مجھے یقین ہے کہ یہ برادرانہ رشتے آنے والے وقتوں میں مزید پروان چڑھتے رہیں گے۔ شہباز شریف نے کہا کہ دونوں برادر ممالک کے عوام کے باہمی مفاد کے لئے وہ اپنے بھائی سعودی ولی عہد کے ساتھ مل کر کام کرنے کے منتظر ہیں۔