اسلام آباد۔9مارچ (اے پی پی):وفاقی سیکریٹری اطلاعات و نشریات شاہیرہ شاہد نےنیشنل پریس کلب کے نومنتخب صدر اظہر جتوئی اور دیگر عہدیداران کو مبارکباد دیتے ہوئے کہا کہ حکومت آزادی اظہار رائے کے ساتھ ساتھ آزاد صحافت پر یقین رکھتی ہے۔
ہفتہ کو اپنے ایک بیان میں وفاقی سیکریٹری اطلاعات و نشریات نے کہا کہ نومنتخب عہدیداران کی کامیابی ووٹر کے اعتماد کا مظہر ہے۔انہوں نے کہا کہ حکومت آزادی اظہار رائے کے ساتھ ساتھ آزاد صحافت پر یقین رکھتی ہے، صحافیوں کی فلاح و بہبود کے لئے اقدامات کو یقینی بنائیں گے۔شاہیرہ شاہد نے کہا کہ پریس کلب صحافیوں کی توانا آواز ہے، امید ہے نیشنل پریس کلب کے نومنتخب عہدیداران آزادی اظہار رائے کے تحفظ اور صحافیوں کے مسائل کے حل کے لئے اہم کردار ادا کریں گے۔