اسلام آباد۔10مارچ (اے پی پی):وزیر اعظم محمد شہباز شریف نے وزارت عظمی کا منصب سنبھالنے پر نیک تمنائوں کا اظہار کرنے والے مالدیپ کے صدر ڈاکٹر محمد معزو، سری لنکا کے صدر رانیل وکرمے سنگھے، نیپال کے وزیر اعظم پشپا کمال دہال پراچندا اور بنگلہ دیش کی وزیر اعظم شیخ حسینہ واجد کا شکریہ ادا کیا ہے۔
اتوار کو سماجی رابطے کی ویب سائٹ ایکس پر اپنے پیغام میں وزیر اعظم محمد شہباز شریف نے کہاکہ مالدیپ کے ساتھ اپنے تعلقات کو مزید مستحکم کرنے کیلئے پر عزم ہیں ۔ وزیر اعظم محمد شہباز شریف نے وزارت عظمی کا منصب سنبھالنے پر مالدیپ کے صدر ڈاکٹر محمد معزو کی جانب سے مبارکباد کے پیغام بھجوانے پر ان کا شکریہ ادا کیا اورکہا کہ پاکستان مالدیپ کے ساتھ اپنے تعلقات کو مزید مضبوط بنانے کے لیے پرعزم ہے۔اسی طرح وزیر اعظم محمدشہباز شریف نے اپنے ایکس اکائونٹ پر ایک اور پوسٹ میں نیپال کے وزیر اعظم پشپا کمال دہال پراچندا کی جانب سے مبارکباد کے خط پر ان کا شکریہ ادا کیا ۔ وزیر اعظم شہباز شریف نے کہاکہ وہ نیپال اور پاکستان کے درمیان تعلقات کو ان کی استعداد کے مطابق مزید مستحکم بنانے کیلئے نیپالی ہم منصب کے ساتھ کام کرنے کے خواہاں ہیں ۔وزیراعظم شہباز شریف نے وزیراعظم شیخ حسینہ واجد کی جانب سے مبارکباد کے پیغام کے جواب میں کہا کہ وہ پاکستان اور بنگلہ دیش کے تعلقات کو مزید مستحکم کرنے کے لیے ان کے ساتھ مل کر کام کرنے کے منتظر ہیں۔سری لنکا کے صدر رانیل وکرمے سنگھے کی جانب سے مبارکباد کے پیغام میں وزیراعظم نے کہا کہ انہیں یقین ہے کہ پاکستان اور سری لنکا کے درمیان تعلقات آنے والے دنوں میں مزید مضبوط ہوتے رہیں گے۔