اسلام آباد۔11مارچ (اے پی پی):اسلامی تعاون تنظیم (او آئی سی) کی کمیٹی برائے سائنسی اور تکنیکی تعاون (کامسٹیک) نے لیٹن رحمت اللہ بینو ولینٹ ٹرسٹ (ایل آر بی ٹی) اور مقامی کمیونٹی کے تعاون سے، بستی میرانی، موری سہارو، تحصیل علی پور، ضلع مظفر گڑھ کے دور افتادہ علاقے میں 12 روزہ مفت آئی کیمپ کامیابی سے منعقد کیا۔کامسٹیک کی جانب سے پیر کو جاری بیان کے مطابق اس کیمپ کا مقصد معاشرے کے پسماندہ طبقات کو آنکھوں کی دیکھ بھال کی ضروری خدمات فراہم کرنا ، آنکھوں کی صحت کے بارے میں آگاہی پیدا کرنا اور موتیا کی سرجری کے ذریعے بینائی بحال کرنا تھا ، تاکہ لوگوں کو ان کی بینائی دوبارہ حاصل ہو سکے۔
ایل آر بی ٹی کی پرعزم میڈیکل ٹیم نے ایک ہزار سے زاہد مریضوں کو خدمات فراہم کیں اور انہیں مفت ادویات اور چشمے فراہم کئے۔ مزید برآں مزید تشخیص اور موتیا کی سرجری کے لئے 188افراد کی شناخت کی گئی۔ منتخب مریضوں کو دور دراز کے مقامات سے لاڑ، ملتان میں ایل آر بی ٹی سیکنڈری ہسپتال پہنچایا گیا جہاں ان کے اعلیٰ معیار کے موتیا بند آپریشن کئے گئے جس کے نتیجے میں بصارت میں بہتری اور معیار زندگی بہتر ہوا۔ کل 169 افراد کے موتیا کے آپریشن کئے گئے۔آنکھوں کے کیمپ سے متعلق تمام اخراجات بشمول ادویات، چشمے اور مریضوں کی دور دراز علاقوں سے نقل و حمل کے اخراجات کامسٹیک نے ادا کئے۔ پروفیسر ڈاکٹر محمد اقبال چوہدری کوآرڈینیٹر جنرل کامسٹیک نے کہا کہ ہمیں بینائی بحال کرنے اور ان لوگوں کی زندگیوں کو بہتر بنانے میں اپنا کردار ادا کرنے پر فخر ہے۔ انہوں نے کہا کہ یہ مشترکہ کاوش کامیابی کی ایک مثال ہے جو شراکت داری کے ذریعے حاصل کی جا سکتی ہے۔ انہوں نے ایل آر بی ٹی کی قیادت اور اس کے ماہرین کی ٹیم کا شکریہ ادا کیا۔