واشنگٹن۔12مارچ (اے پی پی):امریکی طیارہ ساز کمپنی بوئنگ کے پیداواری معیار میں خامیوں کی نشاندہی کرنے والا سابق کوالٹی منیجر امریکی شہر کارلسٹن کے ایک ہوٹل کی کار پارکنگ میں اپنی گاڑی میں مردہ پایا گیا ہے۔ بی بی سی کی رپورٹ کے مطابق جان بارنیٹ نے 32 سال تک بوئنگ میں کام اور 2017 میں اپنی ریٹائرمنٹ کے بعد انہوں نے بوئنگ کے خلاف ایک مقدمہ درج کرایا جس میں انہوں نے کمپنی کی طرف سے پیداواری معیار میں خامیوں کی نشاندہی کے باوجود ان خامیوں کو دور کرنے کے اقدامات نہ کرنے کا الزام عائد کیا۔
اپنی موت کے وقت جان بارنیٹ اس کیس سے منسلک قانونی انٹرویوز کے لیے چارلسٹن میں تھے۔ گزشتہ ہفتے بوئنگ کے وکلا کی طرف سے ان سے پوچھ گچھ کی گئی اور ہفتے کے روز مزید پوچھ گچھ ہونا تھی اور ان نہوں نے کمپنی کے خلاف ثبوت فراہم کرنا تھے لیکن ان کے پیش نہ ہونے پر ان کے ہوٹل میں پوچھ گچھ کی گئی جس کے بعد وہ ہوٹل کی کار پارک میں اپنے ٹرک میں مردہ پائے گئے۔بوئنگ کی طرف سے جاری بیان میں جان بارنیٹ کے انتقال پر افسوس کا اظہار کیا گیا ہے۔جان بارنیٹ نے 2010 سے نارتھ کارلسٹن پلانٹ میں کوالٹی مینیجر کے طور پر کام کیا جس نے 787 ڈریم لائنر بنایا تھا ۔جان بارنیٹ نے 2019 میں بتایا تھا کہ دباؤ کے تحت کام کرنے والے کارکن جان بوجھ کر پروڈکشن لائن پر ہوائی جہاز میں غیر معیاری پرزے لگا رہے تھے۔ انہوں نے طیاروں میں آکسیجن کے نظام میں سنگین مسائل کی نشاندہی کی جس کا مطلب یہ ہو سکتا ہے کہ ہر چار میں سے ایک سانس لینے والا ماسک ایمرجنسی میں کام نہیں کرے گا۔انہوں نے کہا کہ جنوبی کیرولائنا میں کام شروع کرنے کے فوراً بعد وہ فکر مند ہو گئے تھے کہ نئے ہوائی جہاز بنانے کے لیے دباؤ کی وجہ سے اسمبلی کے عمل میں تیزی لائی گئی اور حفاظتی معیارات پر سمجھوتہ کیا گیا تاہم بوئنگ کی طرف سے اس کی تردید کی گئی۔بعد ازاں انہوں نے بتایا کہ فیکٹری میں بعض خراب پرزے غائب ہو گئے، بعض مواقع پر غیر معیاری پرزوں کو سکریپ کے ڈبوں سے نکال کر ان طیاروں میں لگایا گیا تھا جو پروڈکشن لائن میں تاخیر کو روکنے کے لیے بنائے جا رہے تھے۔انہوں نے یہ بھی دعویٰ کیا کہ 787 میں لگائے جانے والے ہنگامی آکسیجن سسٹم کے ٹیسٹوں میں ناکامی کی شرح 25 فیصد پائی گئی۔ جان بارنیٹ نے کہا کہ انہوں نے مینیجرز کو اپنے خدشات سے آگاہ کیا تھا لیکن کوئی کارروائی نہیں کی گئی،تاہم بوئنگ نے ان کے دعووں کی بھی تردید کی لیکن امریکی ریگولیٹر، فیڈرل ایوی ایشن ایڈمنسٹریشن کے 2017 کے جائزے نے ان کے کچھ خدشات کو درست قرار دیا ۔انہوں نے یہ بھی کہا کہ فیکٹری میں کم از کم 53 غیر موزوں پرزے غائب ہو گئے ۔ جان بارنیٹ نے ملازمت کے دوران مسائل کی نشاندہی پر کمپنی کی طرف سے اپنی تذلیل کرنے اور اپنے کیریئر میں رکاوٹ ڈالنے کا الزام لگایا تاہم بوئنگ کی طرف سے الزامات کو بھی مسترد کر دیا گیا تھا۔جان بارنیٹ کی موت ایسے وقت ہوئی ہے جب بوئنگ اور اس کے کلیدی سپلائر سپرٹ ایرو سسٹمز دونوں کے پیداواری معیارات کی سخت جانچ پڑتال کی جا رہی ہے۔