اسلام آباد۔14مارچ (اے پی پی):وزیراعظم محمد شہبازشریف نے کہا ہے کہ پاکستان کے قطر کے ساتھ قریبی اور برادارنہ تعلقات ہیں، دونوں ممالک کے مابین معیشت، تجارت اور سرمایہ کاری سمیت مختلف شعبوں میں تعاون کو مزید مستحکم بنانے کی بھرپور صلاحیت موجود ہے۔
ان خیالات کا اظہار انہوں نے پاکستان میں قطر کے سفیر علی مبارک علی عیسیٰ الخطر سے گفتگو کرتے ہوئے کیا جنہوں نے جمعرات کو یہاں ان سے ملاقات کی۔ وزیراعظم آفس کے میڈیا ونگ کی طرف سے جاری بیان کے مطابق وزیراعظم نے قطر کے امیر شیخ تمیم بن حمد الثانی، نائب امیر شیخ عبداللہ بن حمد الثانی اور وزیراعظم شیخ محمد بن عبدالرحمن بن جاسم الثانی کا اپنے وزیر اعظم کے انتخاب پر تہنیتی پیغامات بھجوانے پر شکریہ ادا کیا۔ انہوں نے کہا کہ پاکستان کو قطر کے ساتھ اپنے قریبی، برادرانہ تعلقات پر فخر ہے۔ انہوں نے کہا کہ پاکستان اور قطر کے درمیان معیشت تجارت اور سرمایہ کاری کے شعبوں میں تعلقات مزید مضبوط ہونے کی بھرپور صلاحیت موجود ہے۔انہوں نے مزید کہا کہ خصوصی سرمایہ سہولت کونسل (ایس آئی ایف سی) جو کہ ان کے سابق دور میں قائم کی گئی تھی، اب ایک موثر اور نتیجہ خیز طریقہ کار کے طور پر کام کر رہی ہے اور اس بات کو یقینی بنا رہی ہے کہ غیر ملکی سرمایہ کار پاکستان کے اہم شعبوں یعنی زراعت،انفارمیشن ٹیکنالوجی، کان کنی اور معدنیات کے شعبوں میں سرمایہ کاری کے مواقع سے فائدہ اٹھایا جا سکے۔ وزیراعظم نے غزہ میں امن کی کوششوں میں قطر کے تعاون کو سراہا۔ انہوں نے کہا کہ یہ امر انتہائی افسوس ناک ہے کہ رمضان کے مقدس مہینے میں بھی غزہ میں تشدد کا سلسلہ جاری ہے۔وزیراعظم نے اگست 2022 اور مارچ 2023 میں قطر کے اپنے سرکاری دوروں کا ذکر کرتے ہوئے قطر کے امیر کو پاکستان کا سرکاری دورہ کرنے کی دعوت دی ان کا کہنا تھا کہ پاکستان کے عوام مستقبل قریب میں ان کے استقبال کے منتظر رہیں گے۔ قطر کے سفیر نے وزیراعظم کا شکریہ ادا کیا اور کہا کہ وہ دونوں ممالک کے درمیان مضبوط تعلقات کو فروغ دینے کی پوری کوشش کریں گے۔