صوبائی محکمہ ٹریفک کے مطابق افغانستان کے جنوبی صوبے ہلمند میں میں ایک ٹریفک حادثے میں کم از کم 21 افراد ہلاک اور 38 زخمی ہو گئے۔امریکی خبر رساں ادارے اے پی کے مطابق محکمہ ٹریفک کے ایک بیان میں کہا گیا ہے کہ حادثہ اتوار کی صبح صوبہ ہلمند کے ضلع گیرشک میں جنوبی قندھار اور مغربی ہرات کے درمیان مرکزی شاہراہ پر پیش آیا۔ہلمند کے ایک ٹریفک اہلکار قدرت اللہ نے بتایا کہ یہ حادثہ ایک موٹر سائیکل کے مسافر بس سے ٹکرانے اور پھر سڑک کے مخالف جانب ایک ٹینکر سے ٹکرانے کے باعث پیش آیا۔انہوں نے مزید کہا کہ حادثے کی تحقیقات جاری ہیں۔ہلمند پولیس کے سربراہ کے ترجمان عزت اللہ حقانی نے بتایا کہ 38 زخمیوں میں سے 11 افراد شدید زخمی ہیں جن کو ہسپتالوں میں منتقل کر دیا گیا۔ افغانستان میں ٹریفک حادثات عام ہیں جو سڑکوں کی خستہ حال حالت اور ڈرائیوروں کی لاپرواہی کی وجہ سے پیش آتے ہیں۔
دسمبر 2022 میں سالنگ پاس میں میں ایک آئل ٹینکر الٹنے سے 31 افراد ہلاک اور درجنوں جھلس کر زخمی ہو گئے تھے۔