اسلام آباد۔25مارچ (اے پی پی):پاکستان نے رمضان کے مقدس مہینے کے دوران غزہ میں فوری جنگ بندی کے مطالبہ پر مبنی اقوام متحدہ کی سلامتی کونسل کی قرارداد 2728 کی منظوری کا خیرمقدم کیا ہے۔ ترجمان دفتر خارجہ کی جانب سے جاری ایک بیان میں کہا گیا ہے کہ ہم سلامتی کونسل کی طرف سے غزہ میں انسانی امداد کی آزادانہ ترسیل کی اجازت دینے، انسانی امداد کی فراہمی میں حائل تمام رکاوٹوں کو دور کرنے اور پوری غزہ کی پٹی میں شہریوں کے تحفظ کو یقینی بنانے کے مطالبے کا بھی خیر مقدم کرتے ہیں۔
گزشتہ چھ ماہ کے دوران، پاکستان نے متعدد بار اسرائیل کی جانب سے طاقت کے اندھا دھند استعمال کی شدید اور واضح مذمت کا اظہار کرتے ہوئے فوری اور غیر مشروط جنگ بندی، غزہ کے محصور لوگوں کو بلا تعطل انسانی امداد، بے گھر فلسطینیوں کی واپسی اور اسرائیل کی اس کے جرائم کے لیے جوابدہی کو یقینی بنانے کا مطالبہ کیا ہے۔ہم سلامتی کونسل کی آج منظور کی گئی قرارداد پر تیزی سے عمل درآمد کا مطالبہ کرتے ہیں، امید ہے کہ یہ اسرائیل کے وحشیانہ حملوں کو روکنے، مستقل جنگ بندی کو یقینی بنانے اور غزہ میں موجودہ سنگین انسانی صورتحال سے نمٹنے میں مدد فراہم کرنے کے لیے پہلے قدم کے طور پر کام کرے گی۔ ترجمان نے کہا کہ پاکستان جون 1967 سے قبل کی سرحدوں کی بنیاد پر فلسطین کی ایک محفوظ، قابل عمل، متصل اور خودمختار ریاست جس کا دارالحکومت القدس الشریف ہو، کے قیام کے ذریعے منصفانہ، جامع اور پائیدار حل کے لیے اپنی حمایت جاری رکھے گا۔