پاکستان کی وفاقی کابینہ کا اجلاس وزیراعظم شہباز شریف کی زیرِ صدارت آج اسلام آباد میں ہونے جا رہا ہے۔ اجلاس میں بعض وزرا زوم کے ذریعے آن لائن شرکت کریں گے۔
سنیچر کو دن 12 بجے بلائے گئے وفاقی کابینہ کے اجلاس کا پانچ نکاتی ایجنڈا جاری کیا گیا ہے۔اجلاس اسلام آباد ہائیکورٹ کے ججز کے خط پر تحقیقات کے لیے انکوائری کمیشن کے قیام کی منظوری دے گا۔جمعرات کو وزیراعظم اور چیف جسٹس قاضی فائز عیسیٰ کی ملاقات کے بعد وفاقی وزیر قانون اعظم نذیر تارڑ نے کہا تھا کہ اسلام آباد ہائیکورٹ کے ججز کی جانب سے لکھے گئے خط میں لگائے الزامات کی تحقیق ایک انکوائری کمیشن کرے گا جس کی منظوری وفاقی کابینہ کے اجلاس میں دی جائے گی۔وفاقی کابینہ کے ایجنڈے پر پیپرا کی سالانہ رپورٹ کا جائزہ لینا بھی شامل ہے جو اجلاس میں پیش کی جائے گی۔پاکستان کی وفاقی کابینہ رومانیہ کے ساتھ مختلف شعبوں میں تعلقات اور تعاون بڑھانے پر بھی غور کرے گی۔