لاہور۔31مارچ (اے پی پی):لاہور الیکٹرک سپلائی کمپنی(لیسکو)نے بجلی چوروں کے خلاف جاری آپریشن کے دوران مزید6 ملزمان گرفتار کر لئے ،ملزمان کو بھاری جرمانے عائد کئے گئے ہیں ۔
ترجمان کے مطابق وزارت توانائی پاور ڈویژن کی ہدایت کے مطابق چیف ایگزیکٹو لیسکو انجینئر شاہد حیدر کی زیر نگرانی انسداد بجلی چوری مہم رمضان المبارک میں بھی کامیابی کے ساتھ جاری ہے،گزشتہ 24 گھنٹوں کے دوران ریجن بھر میں مجموعی طور پر352ملزمان بجلی چوری میں ملوث پائے گئے جن میں سے 127کے خلاف مقدمات درج ہوچکے ہیں،پکڑے جانے والے کنکشنز میں16 کمرشل،4 زرعی، 1 انڈسٹریل اور331ڈومیسٹک تھے، تمام کنکشنز منقطع کرکے ان کو2 لاکھ47 ہزار2 سو 67 یونٹس ڈٹیکشن بل کی مد میں چارج کئے گئے ہیں جن کی مالیت71لاکھ 98ہزار6سو25 روپے ہے جبکہ بجلی چوروں کیخلاف کئے جانے والے آپریشن میں بڑے کمرشل صارفین بھی بجلی چوری میں ملوث پائے گئے، ان تمام کے کنکشنز بھی منقطع کئے گئے اوران کو ڈٹیکشن یونٹس چارج کئے گئے ہیں۔ترجمان نے بتایا کہ گنڈا سنگھ والا کے علاقے میں کنکشن کو 5 لاکھ 50 ہزار روپے، قلعہ گجر سنگھ کے علاقے میں کنکشن کو1 لاکھ 40 ہزارروپے، مصطفی ٹائون کے علاقے میں ایک ملزم کو 1 لاکھ روپے اور مزنگ کے علاقے میں ایک اور ملزم کو بھی بجلی چوری پر 1لاکھ روپے کی رقم چارج کی گئی ہے۔ترجمان نے مزید بتایا کہ انسداد بجلی چوری مہم کو195روزمکمل ہوگئے ہیں، اس دوران کل 69ہزار2 سو 32ملزمان بجلی چوری میں ملوث پائے گئے،67ہزار1سو7 ملزمان کیخلاف مقدمات درج کروا کے26ہزار4 سو 86 ملزمان کو گرفتار کیا گیا، بجلی چوروں کو اب تک 8 کروڑ58 لاکھ 66 ہزار 58 یونٹس چارج کئے گئے ہیں جن کی مالیت 3ارب24 کروڑ69 لاکھ 25 ہزار6سو3روپے ہے۔ لیسکو چیف نے کہا ہے کہ بجلی چوری کے مکمل خاتمے تک بلا تفریق گرینڈ آپریشن جاری رہے گا۔