اسلام آباد۔1اپریل (اے پی پی):اسلام آباد ہائیکورٹ کے چیف جسٹس عامرفاروق اور جسٹس میاں گل حسن اورنگزیب پر مشتمل ڈویژن بنچ نے نیب پراسیکیوٹر کے بیان کی روشنی میں توشہ خانہ ریفرنس میں بانی پی ٹی آئی اور بشریٰ بی بی کی سزا معطل کرنے کا حکم سنادیا۔
گزشتہ روزتوشہ خانہ ریفرنس میں سزاؤں کے خلاف اپیلوں پر سماعت کے دوران بیرسٹر علی ظفر اور دیگر جبکہ نیب کی جانب سے امجد پرویز،سپیشل پراسیکیوٹر چودھری نذر اور دیگر عدالت پیش ہوئے۔جسٹس میاں گل حسن اورنگزیب نے کہاکیا نیب سزا معطلی پر کوئی موقف پیش کرنا چاہتا ہے؟جس پر نیب پراسیکیوٹر نے کہاسزا معطلی پر کوئی اعتراض نہیں، اپیلیں ابھی نہیں سنی جا سکتیں، وکیل نے استدعاکی کہ سزا کے ساتھ سزا کا فیصلہ بھی معطل کر دیا جائے،جسٹس میاں گل حسن اورنگزیب نے کہاوہ معاملہ سپریم کورٹ میں ہے، ابھی اسکو چھوڑ دیں،عدالت نے بانی پی ٹی آئی اوربشریٰ بی بی کی توشہ خانہ ریفرنس میں سزاؤں کو معطل کرتے ہوئے نیب پراسیکیوٹر سے کہاکہ نیب کابڑا قابل تعریف موقف ہے،عدالت نے سماعت عید کے بعد تک کیلئے ملتوی کردی۔